51st IEC usa sa labing maayo; amot nabinla’g P20 M

GIHULAGWAY sa mga opisyal sa International Eucharistic Congress nga ang gipahigayon nga 51st IEC dinhi sa Sugbo niadtong Enero ning tuiga ang usa sa mga labing maayo ug mitatak sa ilang kasingkasing.

Samtang ang human mokanaug ang ilang budget sa mao nga kalihukan, nabinlan ang Archdiocese og P20 milyunes nga magamit nila sa ubang mga proyekto.

Sila si Arsobispo Pie­ro Marini, presidente sa pontifical committee sa IEC, ug Padre Vitorre Boc­cardi, secretary sa samang committee sa IEC, sa ilang report ngadto kang Pope Francis nga gisugilon sa mga opisyal sa Artsidyosesis sa Sugbo.

Si Cebu Archbishop Jose Palma niingon nga base sa gisaysay ni Boccardi sa iyang report niadtong Mayo 2 nga sukad niadtong 1980 sa sobra 10 ka mga IEC nga iyang natambungan, ang 51st IEC Cebu ang iyang gihulagway nga labing maayo ug dili makalimtan.

Mitatak sa iyang kasingkasing ang daghang mga tawo nga nitambong sa prosesyon gikan sa Kapitolyo paingon sa Plaza Independencia nga solemne ug puno sa adorasyon sa Eukaristiya.

Samtang si Marini nakadayeg sa kadaghan sa mga tawo nga nitambong sa mga kalihukan sa IEC ug mga nitabang nga mahimong malampuson ang dakong kalihukan.

“Kining moingon nga one of the best IEC, murag makuyawan baya mi mosulti ana kay mura bag nanghambog ta. But it’s not really nanghambog ta, it’s not coming from us man gud, it’s coming from them,” pahayag ni Bishop Dennis Villarojo, secretary-general sa committee on preparations sa IEC Cebu atol sa press conference kagahapon.

Nikabat ngadto sa P150 milyones ang pasiunang nakolekta sa mga tigpasiugda sa 51st IEC gikan sa mga donor, registration sa mga delegate ug ubang kalihukan nga nakatabang sa koleksyon sama sa Piso-Piso Para sa Misa ng Mundo.

Matod niya gikan sa P262 milyones nga maoy unang orihinal nga budget nila sa kalihukan, nikanaug kini ngadto sa P130 milyones ug kapin kun kulang P20 milyones ang sobra.

Si Villarojo dali nga nipatim-aw nga pasiuna pa lang kini nga kwentada sanglit aduna pa sila’y bayrunon ug wala pa nila mahuman og kwenta ang tanan nga nakolekta ug nahipos nga donasyon.

Sila nipasalig nga mohatag sa kinatibuk-ang kwentada ngadto sa publiko.

Matod ni Palma ang sobra nga pundo gamiton sa mga programa nga pasiugdahan sa IEC Foundation sama sa tree planting ug pagpatukod og abtanan alang sa mga kabus ug libud suroy nga plano tukoron luyo sa simbahan sa St. Joseph Parish sa Barangay Mabolo, siyudad sa Sugbo.

Kini ang ikatulo sa mga landmark nga handumanan sa selebrasyon sa IEC uban sa Pavilion ug Eyukaristiya nga naa sud sa compound sa Archbishops Palace.

Ang mga handumanan sa dakong kalihukan sa simbahan ang makita ug mabasa usab sa libro nga giprinta sa artsidyosesis.

Moabot sa 5,000 ang kopya sa libro nga gibaligya sa tag P2,000 matag u­sa. Ang kapin sa 2,000 ang aduna nay tag-iya.

Ang 284 ka mga panid sa libro nagpakita sa usa ka semana nga mga kalihukan, mga hulagway, ug summary sa mga pakigpulong sa nagkadaiyang speaker.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph