Batang Pier milubong sa Elite

IMPRESIBONG pagbalik maoy gipakita sa Fil-Am rookie nga si Stanley Pringle aron aswaton ang GlobalPort Batang Pier ngadto sa 100-76 nga kadaugan ba­tok sa Blackwater, 100-76, kagabii sa PBA Governor’s Cup sa Araneta Coliseum.

Ang 6-0 nga Pringle, kinsa napiangan sa iyang tuo nga tikod sa niaging conference, mipasinati sa iyang presensiya sa iyang unang sa Governor’s Cup pinaagi sa iyang 18 puntos.

Ang kanhi pambato sa Penn State mipabuto og upat sa unom niya ka itsa sa three-point area samtang mipakatap kini og upat ka assists, tulo ka rebounds ug duha ka steals sa 14 minutos sulod sa korte.

“Pine-pacing pa namin siya (Pringle) eh. Gigil na gigil na maglaro, kaya parang napakawalan eh. At least, na-feel niya uli ‘yung game,” matod ni GlobalPort coach Pido Ja­rencio.

Sa kadaugan, ang GlobalPort mao na karon ang misakmit sa tempo­raryong liderato sa overall standing nga may 2-0 nga baraha. Malisod nga tahas ang ilang sa­gubangon sa sunod nilang duwa diin ilang ikaharong ang defending champion Purefoods Star Hotshots sa Martes.

Si Terence Romeo mikadlit og 20 puntos samtang midugang si Ronjay Buenafe og 16 alang sa Batang Pier kinsa misurprisa sa Meralco sa una nilang tahas.

Samtang nangulo sa pildirong Blackwater si Marcus Douthit nga may 24 puntos ug 15 ka re­bounds ug upat ka assists apan di kini igo aron masalbar ang Elite sa 0-2 nga pagsugod sa conference.

Mga puntos:

GlobalPort 100 - Romeo 20, Pringle 18, Buenafe 16, O’Bryant 11, Kramer 7, Mamaril 6, Isip 6, Pinto 4, Jensen 4, Semerad 3, Miranda 3, Krayem 2, Taha 0, Ponferada 0, Caperal 0.

Blackwater 76 - Douthit 24, Cervantes 11, Reyes 9, Laure 8, Heruela 7, Celiz 6, Salvacion 5, Golla 2, Gamalinda 2, Acuna 2, Timberlake 0, Erram 0, Bulawan 0, Ballesteros 0.