NAGBUNGA ang tanang paningkamot, sakripisyo ug pag-antos ni Philippine marathon queen Mary Joy Tabal kagahapon sa dihang milampos siya pag-qualify alang sa umaabot nga 2016 Rio Olympics.
Ang lumad nga taga Brgy. Guba, Cebu City nakalusot sa Olympic qualifying time sa full marathon nga 2:45:00 sa dihang mioras siya og 2:43:31 sa laing qualifying event nga gisalmutan nga mao ang ScotiaBank Ottawa Marathon sa Canada.
Ang miyembro sa Motor Ace Philippines-Kawasaki Racing maoy labing unang babaye nga marathoner sa Pilipinas nga naka-qualify sa Olympics, nga usa ka prestihiyusong kompetisyon nga ipahigayon matag upat ka mga tuig.
Nabuak sab sa 26 anyos nga produkto sa Southwestern University (SWU) athletics ang marathon record sa Pilipinas nga 2:44:21 nga naposte ni Jhoann Banayag niadtong 2007 Southeast Asia Games (SEAG) sa Bangkok, Thailand.
Sa pagpakighinabi ning mantalaan kagahapon pinaagi sa messenger, si Tabal nagkanayon nga dihang mianinaw na ang iyang kalampusan sa katapusang 200 meters, wala na siya nakasabot sa iyang gibati ug midagayday ang iyang mga luha samtang nagdagan.
Matod ni Tabal nga dihang nakita na niya ang dakong orasan sa finish line diin nasayod na siyang makalusot siya sa qualifying time, daw naglutaw na siya sa hangin gumikan sa kalipay nga iyang gibati.
“Pag-abot nako sa last 200 meters, nakita nako ang time nga segurado na nakong maabot ang qualifying time, wala nako nakasabot sa akong gibati ug nagsige na lang ko’g hilak,” matod ni Tabal.
“Mura’g naay kuryente ang akong tibuok lawas. Wala na nako na-feel nga nagdagan ko, mura nako’g naglutaw sa hangin.”
Si Tabal naa sa ikalimang dapit sa female 25-29 yrs, old category diin 200 ang nanagan, ikawalo siya sa tanang 1,562 ka mga babaye nga nanagan ug ika-38 sa overall diin lakip na ang mga lalake nga partisipante diin niabot og 4,416 ang ningsalmot.
Alang ning maong tahas, si Tabal nag-training sa Japan sa Nippon Sports Science University (NSSU) training center.
Kini maoy ikaduhang pagsuway ni Tabal nga maka-qualify sa Olympics. Napakyas siya sa premiro niyang pagsuway diin igo lang siyang mioras og 2:49:00 sa Boston Marathon sa miaging buwan.
Si Tabal, silver medalist sa 28th SEAG, nagkanayon nga kasamtangang nagplano ang Motor Ace Philippines ug ang dugay na niyang coach dinhi sa Sugbo nga si John Philipi Duenas alang sa iyang pagpangandam sa Rio Olympics.
“I will prepare for the Rio. I don’t know yet basta I just have to finish it strong and safe and make the Philippine proud. I will train for it after I recovered,” matod ni Tabal.
Sa kasamtangan, nagkanayon si Tabal nga maglulinghayaw una siya sulod sa pipila ka mga adlaw sa Canada aron tagamtamon ang katam-is sa iyang kalampusan.
Gipabuhagay ni Tabal ang dako niyang pasalamat sa Motor Aces Philippines nga wala magduhaduha sa pagsuporta kaniya.
Nagpasalamat sab si Tabal sa kanhi atleta sa University of Cebu (UC) nga si Ricardo Mansueto, kinsa nagbasi na karon sa Canada. Matod ni Tabal, si Mansueto maoy nagtabang kaniya sa iyang pagpuyo sa Canada.