Talikala: Kakabos wa makababag sa paglampos

BATAN-ON pa lang si John Louie Zabala, daghan na siya og na­kab-ot nga kalampusan sa kinabuhi.

Kinsa ang magdahom nga ang kanhi gamay nga bata ug sungogon sa Barangay Bulacao, dakbayan sa Sugbo ang mahimo nga usa ka dakong personalidad sa katilingban?

Taliwa sa kakabos sa iyang pamilya, si Louie nakatapos sa sekondarya ug kolehiyo pinaagi sa iyang paningkamot ug kugi sa pag-eskwela.

Siya ang kamanghuran sa lima ka magsuon.

Siya ang kaabag sa iyang Nanay Asuncion sa pagpaninda og sarisari nga tinda dihang bata pa siya. Ang iyang Tatay Romualdo namatay sa sakit nga diabetes sa dihang nagpangidaron pa lang siya og 5-anyos.

Bata pa lang si Louie aktibo usab siya sa paugnat sa kusog sa­ma sa pag-apil sa mga kompetisyon sa taekwon­do ug nakalangkat og mga medalya sama sa bulawan.

Tungod sa kalisod sa pangi­nabuhi, naningkamot siya nga ma­katungha sa sekondarya ug nahimong academic scholar sa Allan Co-Chan Go Foundation gikan sa 1st year hangtod sa 4th year high school sa University of San Jose-Recoletos sa Barangay Basak Pardo, ning siyudad.

Sa pagtungtong sa ko­lehiyo, usa siya ka working student sa USJR main campus sa kursong Bachelor in Library and Information Science.

Bisan og gibahin ang iyang o­­­ras sa pagtuon ug pag-duty sa main library sa unibersidad, siya ni-graduate isip magna cum laude ni­adtong Marso 2012.

Sa samang tuig, nahimo siyang 4th placer sa Librarian Licensure Examination.

Niadtong Abril 2012, nadawat si Louie isip librarian sa Cebu Ins­titute of Technology-University (CIT-U) hangtod sa Mayo 2013.

Pagka Hunyo 2013, nahimo siya nga maestro ug librarian sa USJR hangtod sa Mayo ning tuiga.

Wala pa dinhi natapos ang i­­yang kagustuhan nga daghan og makat-on tungod kay nitungha usab siya ug nitapos og Master in Library and Information Science sa Cebu Normal University niadtong Marso sa niaging tuig.

Sa pangidaron nga 23-anyos, si Louie napili nga labing una nga Philippine ambassador ngadto sa International Librarians Network (ILN) bisan sa kadaghan sa mga aplikante nga ang uban mga libra­ry directors pa.

Ang ILN usa ka pundok sa mga volunteer librarians nga naumol niadtong 2012.

Isip usa ka lisensiyado nga librarian, siya nipasiugda og adbokasiya ang paghimo og reading center sa kabarangayan sa Sugbo uban sa abag sa iyang mga higala.

Usa sa iyang nasugdan sa Barangay Banilad uban sa abag sa mga opisyal sa barangay ug Basadors, usa ka non-government organization nga nagbase sa Sugbo.

Matod ni Louie mahinungdanon nga dunay mabasa ug mahilig mobasa og mga libro ang kabataan karon tungod kay daghan sila og makat-onan.

Karon, padayon nga gihikay ang paghimo og reading center sa mga barangay Bulacao ug Basak Pardo ning siyudad.

Iya usab nakita ang pa­nginahanglan nga mag­butang og public li­bra­ries ang nagkadaiyang local go­­vernment units sa nasod alang sa kabos nga kabataan.

Si Louie nidasig sa kabataan nga padayon magdamgo ug molantaw sa ka­ugmaon bisan sa mga hagit sa ki­nabuhi ug ubanan og pag-ampo sa Ginuo ug kugi sa pagkab-ot sa mga pangandoy.

“You need to have a vision. You need to have a dream amidst economic challenges. (If you are successful) stay grounded, be a prayerful and God centered person,” sumala niini sa pakig­hinabi sa Superbalita Cebu.

Sa kasamtangan, anaa siya nagtrabaho sa De La Salle University sa kaulohan isip usa ka librarian sugod niadtong Mayo 23 ning tuiga.