PADULONG nga magabot sila Matt Steven Palasan ug John Renest Sonsona sa finals human sa ilang impresibong kadaogan pagabli sa ilang kampanya sa under-18 (U18) boys sa nagpadayon nga mga aksyon sa 2016 Milo Junior Tennis Cup Mindanao Leg sa Nazareth Lawn Tennis Club.
Gipilde sa seeded number one nga si Palasan, lumad sa Nazareth, ang manghod nga Sonsona nga si John Steven, 6-1, 6-1, aron moabante sa semifinals batok kang Auden Aaron Paduganan.
Daog sab ang magulang nga Sonsona, garbo sa Tubod, Lanao del Norte, human gipilde niya ang Yvu Dandasan, 6-0, 6-3, ug maatubang sa kinsa modaog nila Dean Cassius Rvanne Maglinao ug Dawson Jean Ormoc sa semifinals.
Paingon sab nga magabot ang Philippine number one U10 nga si Heinz Aslan Carbonilla ug seeded number two nga si Kurt Gervan Bandolis sa U10 unisex human gipangblangkohan nila ang ilang kadaiyang kaatbang sa unang round.
Gipilde ni Carbonilla si Marc Claudio Fernandez, 4-0, 4-0, ug maengkwentro si Carlo Jay Paumar sa semifinals.
Abante sab si Bandolis sa semifinals human giparot niya si Christian Joyo, 4-0, 4-0, sa quarterfinals.