Dear Noy Kulas,
Tawga lang ko og Nonoy, 28 years old, nagtrabaho as call center agent sa una pero natangtang ko tungod sa akong pagka drug user. Pirme na kong palta sa akong duty hangtod nga gitaktak ko kay akong nawong toa ra sa akong suki nga suyopanan.
Minyo na ko ug akong tan-aw affected na ang akong pamilya kay ang akong asawa pirme na mangaway nako kay wa na koy trabaho. Magpangayoan na lang ko niya og kwarta aron makasuyop. Nagduda ko, Noy, nga nakahibawo ang akong misis sa akong bisyo pero wa lang makasulti nako kay bisan unsaon ko niya og away, di ko motubay kay nakahibawo ko nga ako ang nasayop. Pero unsaon nako pagbiya aning akong bisyo nga maora kog mabuang kon di makasuyop.
Noy, naa pa kaha koy paglaum makagawas aning akong bisyo? Nakahibawo ko sa problema pero lisod biyaan. Apektado kaayo ko kon di ko makasuyop. Human nako og suyop, lami na ang akong feeling. Madala pa kaha ko og rehab?
NONOY
Noy,
At least imong giila nga ang imong bisyo maoy problema. Mao nay first step kay kon ang tawo wa makahibawo sa iyang problema, lisod kaayo sulusyonan ang iyang giatubang.
Ikaduha mao ang pagpangita og sulusyon. Ang sulosyon mao ang rehabilitation. Gikinahanglan nga mosulod ka og institution aron matabangan ka kay naglisod ka og piog sa imong addiction karon. Pero sa di ka pa magpa-rehabilitate, pakigsultihi ang imong asawa. Angkona nga ikaw drug addict ug nakigbisog sa imong addiction. Nagkinahanglan ka og tabang niya. Pagpaubos bisan unsa may isulti sa imong asawa kay mosamot ang kasuko niana kon makahibawo na. Pero pangayo og pasaylo kay sa tinuod, sala na ang imong gibuhat kay gibutang mo sa risgo ang imong pamilya. Di baya ordinaryo ang pangutok sa tawo nga drug addict.
Hinaut pa nga makabaton ka og kaisog sa pag-angkon ngadto niya kay mao ra nay sulbad sa imong problema. At least giangkon nimo nga ikaw drug addict ug kini dako nga problema.
NOY KULAS
(Alang sa imong problema, e-mail sa kulassuper@sunstar.com.ph ug rojval69@yahoo.com)