NANGAYO og hustisya ang mga ginikanan sa masuso nga namatay dihang gianak sulod sa delivery room sa Vicente Sotto Memorial Medical Center niadtong Hunyo 5 sa buntag.
Ang mga ginikanan nagduda nga dunay pagpabaya sa habig sa mga doktor sa maong tambalanan.
Kagahapon, nidangop sa Cebu City Police Office (CCPO) ang magtiayong Edalene, 32, walay trabaho, ug Roldan Añosa, taga sitio Sudtunggan, Barangay Basak, dakbayan sa Lapu-Lapu.
Si Department Department of Health (DOH) Secretary Janette Garin, sa iyang bahin, nimando na usab sa rehiyonal nga buhatan sa pagpahigayon og imbestigasyon sa kamatayon sa masuso.
Ang magtiayong Añosa nakigkita kang Women and Children Protection Center chief Inspector Arieza Otida aron matabangan sa ilang pagpasaka og reklamo batok sa mga doktor nga wa niya mailhi ang ngan.
Matod niya nga niadtong Hunyo 4 naabot sila sa VSMMC sanglit nagbati na siya.
Iyang gihangyo ang doktor nga nag-atiman kaniya nga ipa cesarean section siya kay maoy tambag kanilang magtiayon sa usa ka staff sa mao nga ospital kay di maayo ang posisyon sa bata sa iyang sabakan kay nag-una ang sampot.
Giingong giingnan siya sa doktor nga wa niya mailhi nga kon siya i-caesarean section, kinahanglan nga ipa-ligate siya aron di na manganak pa apan wa mosugot ang iyang bana.
Bisan sa pag-insister sa magtiayon nga siya i-cesarean, wa kini buhata.
Sa kaadlawon nga hapit na siya nga manganak, gipabilangkad siya sa mga personnel.
Matod ni Edalene nga gipugos sa pagbila ang iyang duha ka mga paa ug nimando ang doktor sa pag-utong og kusog aron mogawas ang sampot sa bata.
Nigawas ang katunga sa lawas sa bata apan naglisod na ang doctor ug mga nars kay nasangit ang liog sa iyang pwerta.
Pipila ka minutos ang milabay, iyang nabatyagan nga gikalit pagbira ang bata hangtod nga nakuha.
“Nakakita gyud ko nga gibira-bira nila ang bata. Ambot giunsa na to nila pagkuha kay nanawag naman sila og doctor. Paggawas sa bata gidali-dali nila og dala sa ICU kay gitabang,” matod ni Añosa.
Didto sa namatay ang iyang anak nga ilang napalgang dunay mga samad ug bun-og.
Ang death certificate nga nakuha sa magtiayon wa maghisgot sa hinungdan sa kamatayon.
Sa interbyu sa GMA 7 Balitang Bisdak kagahapon, si Garin gustong masayod nganong ang death certificate ni John Niño Añosa wa butangi og hinungdan sa iyang kamatayon.
Dihang siya nakakita sa dokumento, naglibog siya nganong wa kini nakasuwat.
Gusto siyang masayod sa habig sa mga doctor sa VSMMC.
Samtang si Otida nagkanayon nga mohimo sila dayon og fact finding investigation inabagan sa ilang counterpart sa pink room sa VSMMC kon naa sulod sa tambalanan nahitabo.
“We will coordinate everything and rest assured atoang matabangan ang kiningn mga ginikanan, mismo sa bata luoy kaayo, inosente tawon,” matod ni Otida. Dugang taho sa Sun.Star Cebu