KIDAPAWAN CITY -- Gikalipay sa katawhan sa probinsiya sa North Cotabato ang pagkatudlo sa upat ka cabinet members sa administrasyon ni incoming President Rodrigo Duterte.
Ang upat ka miyembro sa gabinete ni Duterte naggunit sa regular nga posisyon ug importanteng cabinet portfolios.
Ang ikaupat nga cabinet secretary nga gipili ni Duterte mao si Dr. Paulyn Jean Rosell-Ubial sa M'lang nga mohulip kang Department of Health Secretary Janette Garin.
Si Dra. Ubial kaila mismo ni Duterte nga paryente sab ni kanhi M'lang Mayor Rodolfo Buenaflor ug Mayor Luigi Cuerpo.
Una nang gitudlo ni Duterte si kanhi Governor Manny Piñol nga gitakda nga molingkod isip secretary sa Department of Agriculture (DA) nga nagagikan gihapon sa M'lang.
Taga probinsiya sab si Perfecto Yasay Jr. nga gikan sa Midsayap nga molingkod nga secretary sa Department of Foreign Affairs (DFA).
Samtang si retired police general Jaime "Bong" Morente gikan sa Midsayap nga natudlo isip commissioner sa Bureau of Immigration (BI).
Nanghinaut ang mga Cotabatenyos nga makatabang og dako sa probinsiya ang upat ka cabinet secretary ni Duterte ilabi na si Pinol alang sa pagpalambo sa agrikultura sa Mindanao ug tibuok nasud nga bag-o lang giigo sa hulaw. (EEF)