IPAUGKAT sa kapulisan sa syudad sa Sugbo ang lawas sa masuso nga bag-o lang gianak sud sa Vicente Sotto Memorial Medical Center niadtong Hunyo 5 aron masuta kon unsay hinungdan sa kamatayon niini.
Matod ni Sr. Supt Benjamin Santos, hepe sa CCPO, nga iyang gimandoan ang hepe sa Women and Children Protection Center, Insp. Arieza Otida nga makig-alayon sila sa mga ginikanan sa bata aron makawot ang lubong.
Ningdangop ang magtiayong Edalene ug Roldan Añosa, taga Lapu-Lapu City sa WCPC tungod sa kamatayon sa ilang anak nga gituohan nga gipugos sa pagpagawas bisan kon suhi ang posisyon.
Namatay ang bata unom ka oras human gihimugso.
Dunay mga bun-og nga nakita sa lawas ug samad sa bilahan sa bata apan way findings ang doctor sa death certificate.
Matod ni Santos nga bisan kon milanat pa og sobra sa napulo ka adlaw sukad gilubong ang bata, mahibaw-an gihapon unsay hinungdan sa kamatayon pinaagi sa autopsy sa PNP Crime Laboratory.
Kon unsa ang resulta sa autopsy, dinhi na magsugod ang imbestigasyon.
Samtang ang VSMMC nagpahigayon og kaugalingong imbestigasyon base una sa media reports, matod ni hospital spokesman Nonoy Mongaya.
Iyang gitataw nga wa pay reklamong giduso sa ilang buhatan mao nga ang media reports una ang gibasehan.
Si chief of hospital Dr. Gerardo Aquino ra ang mobutyag unya sa resulta sa ilang imbestigasyon.