TALIWALA sa ilang kagul-anan, nibati og kalipay ang inahan sa batang namatay human sa unom ka oras dihang iyang gipamugso sa Vicente Sotto Memorial Medical Center (VSMMC) niadtong Hunyo 5.
Kini dihang nasayran nga ang kalihim sa Department of Health (DOH) nga si Janette Garin nimando sa paghimo og imbestigasyon sa ilang reklamo.
Si Edalene Añosa nagkanayon nga dako ang iyang pasalamat nga gihatagan og pagtagad ang ilang reklamo sa mga doktor sa VSMMC aron mahatagan og hustisya ang kamatayon sa iyang anak.
Si Ligaya Moneva, tigpamaba sa DOH 7, nibutyag sa Sun.Star Cebu nga ang magtiayong Añosa pormal nga nipasaka na og reklamo batok sa VSMC sa DOH 7 niadtong Huwebes.
Nasagmuyo ang magtiayon nga wala mopatuo ang mga doktor sa ilang hangyo nga ipaubos sa cesarean section si Edalene human nasayod nga dili normal ang posisyon sa bata sa tiyan.
“Nalipay ko nga daghan nag report ana batok sa Vicente Sotto kay dili lagi ko kadawat sa akong anak kay pwerting daghanang bun-og gyud...” matod ni Edalene Añosa.
Uyon usab siya nga ipaugkat ang lubong sa iyang anak aron ipaubos sa autopsy aron mahibaw-an kung unsa ang gikamatyan sa bata.
Matod niya nga makig-alayon na sila sa Women and Children Protection Center (WCPC) aron tugotan ang kapulisan nga mohimog autopsy sa lawas sa iyang anak.
Apan unahon nila pagkuha ang orinal nga kopya sa death certificate sa bata sanglit kadtong ilang gipakita sa media sa miaging adlawa wala pa kini perma ug dinhi usab mahibaw-an kinsa ang nagpaanak kaniya.
“Okey rako nga ipa autopsy ang akung anak kay aron mahibaw-an unsa gyud ang hinungdan nganong namatay siya,” dugang ni Edalene Añosa.
Niadtong panahon nga gihaya pa nila ang lawas sa iyang anak gusto unta nila nga ipa autopsy dayon apan nagduha-duha sila sa pagtuo nga dunay bayad.
Ning maong kalamboan nga wala diay bayad nagpasalamat siya sa kapulisan labot niini.
Si Insp Arieza Otida, hepe sa WCPC, nagkanayon nga kung mapadala na nila sa PNP Crime laboratory ang ilang request alang sa autopsy ila na kining itakda kung kanus-a himuon ang pag ugkat sa lubong sa bata.
Matod niya nga sa pagkakaron dili pa sila makasugod sa ilang imbestigasyon sanglit wala pa nila mahibaw-i unsa gyud ang gikamatyan sa biktima.
Apan kung duna nay resulta sa autopsy diha na sila magsugod sa ilang imbestigasyon.
“Anha ta magsugod sa atung imbestigasyon so atung tan-awon unsay makita sa autopsy,” matod ni Insp Arieza Otida.
Pakuhaan usab niya og pamahayag ang unang doktor nga miatiman niini didto sa district hospital sa dakbayan sa Lapu-lapu nga mao usab ang ni-refer ngadto sa VSMMC tungod sa sitwasyon sa bata sa iyang tiyan tungod kay alang ni Insp Otida importante nga makasuporta sa kaso ang mga medical document.
Una nang namahayag si Añosa nga duna silay ultra sound nga magmatuod nga nag babag ang bata sa tiyan niini ug dili mahimong sa district hospital ipaanak si Edalene sanglit wala silay kahimanan alang sa cesarean section.
Duna na usab silay gihimo nga suwat hangyo ngadto sa kadagkoan sa ospital sa pagkooperar sa ilang gihimo nga imbestigasyon.