ANG PNP lady Patrollers ug Philhealth misibog ngadto sa semifinals human nanguna sa ilang tagsa-tagsa ka bracket sa womens division sa 2016 Davao City Summer Fest Invitational Open Beach Volleyball didto sa Felis Resort Complex sa Matina Aplaya, dakbayan kagahapong adlawa.
Sila PNP tandem Lourdelyn Catubag ug Karen Kaye Quilario gitagak sila Cascabel's Nicole Sasuman ug Shaina Lyka Panchito 21-4 aron mapabilin ang ilang limpyong rekord, 4-0 sa bracket A samtang sila Philhealth's Liezl Manatad ug Michelle Agton mitala og tulo ka daug kontra sa mga batan-on nga gikan sa University of Immaculate Conception (UIC) nga sila si Kate Jocson ug Nicole Bacmante, 21-6, Gensan Tuna's Angela Lastimosa ug Phoebe Annthea Astilla, 21-4, una gipildi ang University of Mindanao (UM) Tagum's Mary Jane Zapanta ug Buenamae Sedulan, 21-13, alang sa 4-0 record sa bracket B.
Naglaum si Agton nga mapalambo niya ang iyang serbisyo ug spikes aron makuha ang titulo.
"Kailangan talaga namin ayusin ang service and spikes namin kasi mostly nandun ang errors namin."
Samtang si Manatad nagkanayon, "Wala talaga kaming practice, jogging lang ang ginagawa namin, talagang mahihirapan kami kasi nandyan ang PNP lady patrollers."
Sa laing resulta, apil sab ang Davao City Water District (DCWD) ug UM-Tagum nga dunay parehong 3-1 rekord aron makaapil sa semifinals best 4.
Samtang sa pagsulat niining balita, giduwa pa ang men's dibisyon sa torneyo nga giisponsoran sa Sports Development Division sa City Mayor's Office, kauban ang Davao Volleyball Association ug gi-opisyalan sa Philippine Volleyball Federation. (Marizz S. Robilla)