MANANOM og 13,500 ka mga kahoy ang artsidyosesis sa Sugbo sa nagkadaiyang mga parokya sa pito ka mga distrito nga sakop niini.
Kaabag sa artsidyosesis sa paghimo niini ang Metropolitan Cebu Water District, Department of Environment and Natural Resources, Cebu Uniting for Sustainable Water ug University of San Jose-Recoletos.
Kini nga lakang maoy tubag sa panawagan sa Santo Papa nga mahimong tigbantay ug tig-atiman sa mga Binuhat sa Ginuo dinhi sa kalibutan pinaagi sa gipagawas niini nga Laudato Si (Praise Be With You) nga adunay subtitle “On Care for our Common Home,” niadtong Hunyo 18 sa miaging tuig.
Niadtong Lunes sa buntag, ang artsidyosesis nihalad og misa pahinungod sa kalikupan nga gipanguluhan ni Cebu Archbishop Jose Palma uban sa kaparian sa Cebu Metropolitan Cathedral, siyudad sa Sugbo.
Ang arsobispo sa iyang wali, namahayag nga ang katawhan karon wala na magpakabana sa kalikupan nga anamanam nga nagusbat gumikan sa pagpasagad sa uban.
“Today, we realize how much we have abused, how much we have taken for granted, how much we have destroyed this beautiful gift from God,” paambit ni Palma.
Siya nidugang kinahanglan ampingan ang kinaiyahan alang sa mosunod nga mga henerasyon.
Atol sa misa, gihimo ang pagpanumpa sa mga kaabag sa artsidyosesis sa pag-atiman ug pagpanalipod sa kalikupan, mga kabos ug sayon nga mabiktima.
Human sa misa, gisunod ang paglusad sa 51st International Eucharistic Congress Committee on Environment Concern ug ang pinirmahay sa memorandum of agreement alang sa flagship program niini ang “Parish Community-based Pocket Forest Program.”
Si Padre Murphy Sarsonas, chairman sa maong komitiba, niingon ang itanom nga 13,500 ka mga kahoy maoy hulip sa 263 ka mga punoan sa kahoy nga gipamutol aron matukod ang Pavilion nga maoy gipahigayonan sa mga tigom sa IEC, nga nahimutang sa duha ka mga seminaryo sa Barangay Mabolo, dakbayan sa Sugbo.
Matod niya nga adunay pasiunang budget nga P900,000 ang artsidyosesis alang sa lima ka tuig nga programa sa pagpananom og mga kahoy nga gikan sa sobra nga pundo sa IEC.
Si Engr. Noel Dalena, general manager sa MCWD, niingon nga sila ang mohatag sa mga binhi sama sa mahogany, tugas, acacia, mangga, guyabano ug uban pa.
“This is program is not just for water. This is not just for MCWD. Dili lang ni para sa mga Bisdak kondili para sa mga nagpuyo niining kalibutana,” pamulong ni Dalena atol sa launching.
Si Padre Cristopher Maspara, presidente sa USJ-R, namahayag nga sila ang mohatag og spiritual formation sa mga moapil sa pagpananom pinaagi sa seminar, recollection ug catechesis. Matag parokya hatagan nila og eco-parish guide ug sa pocket forest.
Si Bishop Dennis Villarojo, secretary-general sa 51st IEC Cebu, ang programa dunay kalambigitan bahin sa gitudlo sa IEC sa relasyon sa katawhan ug kinaiyahan human gipamutol ang 263 ka kahoy ug initial funding sa IEC.