GIKOMPIRMAR sa pipila ka mga sinaligang tinubdan nga aduna na karoy kasabutan sa potensiyal nga panagsangka tali ni eight-time champion ug senator-elect Manny Pacquiao batok Adrien Broner.
Gani matod pa nga hapit na mahitsas o makompleto ang negusasyon diin ang maong away gikatakda sa bulan sa Oktubre.
Ang vice-president sa Golden Boy Promotions nga si Eric Gomez maoy unang mibutyag niini ngadto sa Boxingscene.com.
Matod pa ni Gomez nga gusto unta nila nga kuhaon si Pacquiao nga maoy sunod kontra sa ilang batos nga si Canelo Alvarez apan mao na lay ilang nasayran nga aduna na diay kasabutan nga nakab-ot ang kampo ni Pacquiao ug Broner.
“We’d love to do a Pacquiao fight [for Canelo], but from what we hear, he has a deal to fight Adrien Broner,” matod ni Gomez.
Apan sa dihang gipangutana, ang promoter ni Pacquiao nga si Bob Arum hugot nga mihimakak niini. Ingon ni Arum nga wa gyud sila maghisgot kon moaway ba og balik si Pacquiao.
“He just got sworn into the Senate and he has to see what his career looks like,” pasabot ni Arum.
Apan ang pagpanghimakak ni Arum wa makapapas sa mga pagduda ni Gomez. Sa follow-up interview sa Boxingscene.com, giingon ni Gomez nga siya mismo ug ang Chief Executive Officer sa Golden Boy Promotions nga si Oscar De La Hoya nakigtagbo ni Bob Arum og kaduha ka higayon sa niaging pipila ka buwan.
Ang panagtagbo didto himoa sa panilamay ni Arum sa Beverly Hills aron hisgutan unta ang posibling Pacquiao-Alvarez fight.
Matod ni Gomez nga giingnan sila ni Arum nga dili available si Pacquiao ni Canelo hinungdan nga nausab ang ilang plano ug si WBO jr. middleweight champion Liam Smith na lang ang ilang giparang ni Alvarez.
Gihulagway ni Gomez si Arum nga malimtanon na.
“Bob, he’s getting pretty forgetful nowadays, but the fact is, he invited us to his house in Beverly Hills and we had lunch with him. In fact, he served us those fancy sandwiches they eat in Beverly Hills with no crust on them and we talked about doing Pacquiao and Canelo,” pagyagyag ni Gomez. “But I do have it under good authority that [Pacquiao] is fighting Broner in an October pay-per-view. So he’s going to be fighting a month after Canelo because he has September.”
Ang FightHype.com misuway og pagkuha mga detalyi sa ubang mga tinubdan ug kini nagpakita nga positibong adunay negusasyon sa Pacquiao-Broner fight.