SECTIONS
Saturday, August 24, 2019

Luzano: Nadara kano ti Administrasyon ni Duterte

TALLO laengen a turog ken uppat a digus... tumugawen ni 16th RP President Duterte! Sakuntip dagiti agur-uray iti aksiyon: Nia ket ti bayagnan ya! Tatta koman tapno makita ti laing dagiti sukir, subeg, pasaway ken aminen a kontra-rang-ay ken talna ditoy pagilian. Ngem ala, urayentayo, pards. Ditanton a makita no pumudno dagiti naipadto a mapasamak. Naipadto kunami ta sakbay pay iti Mayo nuebe a panagpipili wenno eleksiyon... adun dagiti naisawang wenno ballaag ni Apo Digong a mapasamak nangruna iti parikut ti korapsyon, krimen ken droga. Sapay koma ta pudno a maaramid dagita a pangta. Ket no pumudno ti padtomi met... amangan ta NADARA daytoy nga administrasyon ni Pres. elect Rodrigo Duterte. Kuna met dagiti turkab iti dinardaraan: mayat tapno mapunas dagiti puris ken siit iti kagimongan. Ngem buelta met dagiti awan hiligna iti dinuguan: idalanda koma iti due process wenno nainkalintegan a proseso. Ala, nalinteg man wenno killo... ammotayon ti turongen ti pagilian. Idi impakat ni Pres. P-Noy ti Nalinteg a Dalanna... ad-addan sa met kano a kimmillo. So ti sumaruno ket ti Short Cut a Dalan ti Panagkaykaysa, Nam-ay, ken Kagimongan a nadalus iti Korapsiyon, Krimen ken Droga. Iti ababa a pannao: dayta ti DALAN A MANGUKOM!

*****

Babaen iti Dalan a Mangukom ( bukod a buniag ti Karit)... maripot amin dagiti kurakot a nabayagen a nagpiespiesta ken nagpungpungan iti pirak ken buis dagiti umili. Sumangoda itan iti kastigo ti hustisya. No iti kallabes a panawen... kayariganda iti ari ken reyna iti sosyodad... ita a panawen ni Digong... maisaangda amin iti agburburek a danum. Kuna ngarud ni incoming president Duterte: no panggep iti death penalty, saan a pamutbuteng ken pannusa laeng no di ketdi dayta ti subad ti inaramidmo. Apitem ti katukad ti killo nga aramidmo. Dayta ti kayat nga ipakita ken ipaduyakyak ni Digong iti publiko tapno nasamsam-it kano ti hustisya para kadagiti biktima ken nailupitlupit ken naidadanes. Isu ngarud a ti kayatna ket saan a lethal injection no di ketdi BITAY iti sango dagiti umili ti dusa dagiti kiwer ti utekna. Babaen iti Dalan a Mangukom... maukomto dagiti kriminal a nagparparigat kadagiti umili nangruna kadagiti nakurapay. Ket kangrunaanna..babaen iti Dalan A Mangukom... maukumto dagiti tattao a nangparigat kadagiti umili gapu iti droga. Kinapudnona, adda dadakkel a sida iti illegal a droga ti addan iti pagbaludan. Ngem ti anglemna..kasla saanda a nakabalud. Agtultuloy kano met ti negosyoda nga illegal. Ay ket kuna itay nabiit ni Digong: maukomdanto amin dagita karaman dagiti limatek nga opisyales ti gobyerno a kakutsabada. Imbag pay daydi lolok ta NAUKOM saan a gapu iti ANGOT-DROGA... no di ketdi ANGOT-BABAE!

*****

Nadlawyo kadi a kadagiti naglabas laeng nga aldaw... kalpasan iti ballaag ni incoming president Duterte panggep iti illegal a droga... agsasarunon dagiti naitumba, naaresto ken simmuko. Kellaat kano ti kasla ala-kimat a tignay ti kapulisan kontra iti illegal a droga. Kellaat a naaddaanda iti listaan dagiti drug pushers, drug lords/traffickers agraman users. He he... uray ni Apo Rody, napaisem pay iti accomplishments ti PNP iti sidong ti Aquino administration. Adda pay nayablatna a komento: amangan kano ta dagita a mapadpadso ket assets wenno tao met laeng dagiti kiwer nga otoridad. Intumbada dagita tapno awan kumanta kontra kadakuada. He he..kasla huston sa ti timpla ti komento ni Ka Rody ha? Kasta met ti masagsagapmi kadagiti tartaripnong. Kayatna a sawen, nabayagen nga ammo dagiti otoridad no sinno dagiti agbibiag iti illegal a droga, kas negosyo. Ita laeng a nagkutida gapu iti nairakurak a mangted ti Duterte Administration iti dadakkel a kantidad wenno reward (bounty money) kadagiti makatiliw, makapatay, makaitudo kadagiti suspects. Ti laeng pagdaksanna, kuna dagiti sutil: nawayaka kanon nga agitudo iti uray sinno ditan a kayatmo nga itudo a drug pusher tapno makapagkuwartaka laeng. Natural, uray saan a pudno... mabalinmon ti agitudo katukad ti reward money. Awan dumana kano daytoy, kuna ti kararua ni lolok... idi panawen ti Hapon. No intudonaka ti nakaabungot a Pilipino... pugot-uloka kenni Sakang. Siguro ti reward idi ket tiket iti Kabaret. Ngek!

*****

Itay nabiit, ginasot dagiti simmuko a drug users iti deppaarna ti Quezon City. Nailista laeng ti naganda ken nalektyuran bassit, napaawidda kanon. Tsk tsk... saan aya a rumbeng nga agyanda pay laeng koma iti ikut ti pulisya tapno ma-rehab dagitoy ken maammuan kadakuada no sinno dagiti pushers nga am-ammoda? Kaawatan nga iti kasta a sistema, kasla inaramidda laeng a moro-moro ti isyu ti droga. Awan makasiguro nga uray nagkarida dagita a simmuko a didanton agaramat iti illegal a droga... ket saandanton a sublian ti sigud a bisyoda. Awan makaisiguro nga agbalbaliwen dagita gapu ta nakatugawton kas president ni Digong. Kas kalawag ti init ti kinapudno nga adda naggatangan wenno adda supplier iti droga kadagita simmuko a users? Dayta ti rumbeng a suroten koma dagiti otoridad tapno maammuanda no sinno dagiti dadakkel a drug pushers ken drug lords ditoy pagilian. Adda met tsismis a pa-rehabda kano dagiti users. Mayat no pudno dayta nga addang a saan a moro-moro wenno pakitang-gilas (pagpalastog) laeng. Iti sabali met a potahe... idiay Cebu, adda kari ti mayor elect sadiay kadagiti sumuko a drug users (karaman ngata dagiti drug pushers?): libre ti rehab dagitoy ken maipassiar pay dagitoy iti resort wenno outing. He he... gimasen. In short, outing iti resorts ti dusada? Awan makaatiw iti potahe idiay Calabarzon. Maiparada dagiti matiliw a pushers ken users. Walk of Shame campaign daytoy ti maysa a Mayor Halili. Nupay adu ti nangbabalaw iti estilona, maitultuloy latta. Malagipko manen ti arasaas daydi lolok: ammona kano a parparitan ni lolak a mapan agkabaret... ngem rinabii met a mapan sumaklot iti luppo. Siguro no nagaramat pay iti droga daydi lolok... saanen a saklot-luppo no di ketdi SULTOP-PUSEG! Siempre... agin-inudo met itan idiay impierno!

*****

Matagtagiuray nga eksena: inagurasyon ni Pres. Duterte inton Huebes, June 30. No talaga a saanda nga agkinnita kenni VP Robredo... siguradok, nadaranto ti dalanda nga agsirbi iti ennem a tawen. June 30... kasano met ngata ti exit ni P-Noy? Nalinteg ngata wenno naulaw a dalan ti tungpalna? Adda pay angaw: no tumugaw kano ni Duterte: Change is coming. No ag-exiten ni P-Noy: Chain is coming! Angaw laeng dayta ngem saanto ngata a pumudno? Nangruna ket nakassuan ken nagbalud dagiti pinanawanna idi a presidente? Ken maysa pay nga eksena apaman a tumugawen ni Duterte: inagananna ngatan dagiti tallo a heneral ti PNP a karaman iti illegal a droga? Inagananna met ngata dagiti nasurok tallupulo a mayor-elect a pinonduan ti illegal a droga? Itoy a gundaway, yabrasami man ti kablaaw, lamano, saludo, ken dir-imi: Mabuhay President Digong Duterte! Good Luck! Adios mi amor, ciao, mabalos!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph