Martin: Mga isyung Jadine, Aldub, Baron, LedZep

DAGHAN ang nangutana nako kon dili ba mangari sa Cebu silang Jadine Lustre ug James Reid alang sa book launching sa ilang “Jadine.”

Ang mga super maki-Jadine dire sa Sun.Star mamalit unta sa Jadine Book nga tag-P295 each apan sold-out na kuno bisan asang tindahan.

Ako sad nabasahan sa Manila wala pa gi-release ang Jadine Book niadtong June 19, sold-out na ni sa tanang National Book Store. Kon plano mong mopalit, dapat kuno karon pa lang magpa-reserve na. Pastilan kadaghang nabuang. Haha…

Iwas-Pusoy

Sa presscon sa pelikulang “Imagine You and Me” sa Cebu atol sa ilang Kapuso Mall Show sa miaging semana, akong gipangutana si Maine Mendoza bahin sa isyu nila sa kanhi lider sa Sexbomb Dancers nga si Rochelle Pangilinan.

Ang isyu nagsugod dihang gi-repost ni Rochelle ang matod pa mga karaang tweet ni Maine nga maorag nanaway sa SexBomb ug sa kanhi soap opera nilang Daisy Siyete, sama sa “yuck” ug “jologs”. Apan ang maong mga tweet na-post niadto pang Marso 14, 2010 dihang naa pa ang Sexbomb sa Eat Bulaga ug dili pa sikat si Maine. Si Alden Richards na ang nitubag nga “`Wag na lang. No comment na lang.” Si Maine niuyon usab nga dili na lang siya motubag.

Okay, no probs!

Stairway to heaven

Pagkadugay na sa kantang “Stairway To Heaven” sa Led Zeppelin. Grade 1 pa lang ko Stairway to Heaven na na. Sa kadugay sa panahon nganong karon ra man nakahunahuna og kiha ang bandang Spirits nga nangangkon nga kinopya kuno na sa ilang kanta?

Kataw-anan kon wa maniguwang wa moreklamo. Giango-ango na tingali. Ang resulta? Gibasura sa korte ang copyright infringement ug nidaug sa kaso ang mga kompositor sa Stairway to Heaven, ang LedZep singer Robert Plant ug gitaristang Jimmy Page.

Baron, alkansi

Usa ko sa nag-atang sa away ni Baron Geisler ug Kiko Matos sa URCC niadtong Sabado sa live online. Daghan ang nagduda nga drama ra to ang ilang away.

Apan bisan unsaon og tan-aw, ang alkansi ato si Baron. Nisikat na hinuon ang iyang kontrang si Kiko Matos imbes wa man untay nakaila ani niya.

Mao tingali human sa ilang away pu­werteng pasalamat ni Kiko kang Baron ug nga duna na kuno siyay respeto karon ni Baron. Maora ba og ang sukaranan sa respeto diha ra makita sa kaisog sa tawo nga dili moatras og away.

Kon tinud-on ni Baron nga dili na siya moinom ug dili na malambigit sa away, tingali labaw pa sa respeto ang benepisyo nga makuha ni Baron sa iyang pagkatawo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph