Gilas mipildi sa China

PIPILA ka oras sa dihang gianunsyo ang kompletong lineup, ang Gilas Pilipi­nas mirehistro gilayon sa ilang unang daog human masugamak og duha ka sunod­sunod nga kapildihan.

Si Terence Romeo maoy mibida sa ikaupat nga quarter nga maoy nagduslit sa kulbahinam nga 72-69 nga kadaugan ba­tok sa China aron sakmiton ang third place honor sa four-team Imperial City Tour­nament sa Bologna, Italy.

Ang wingman sa GlobalPort mipabuto og 13 puntos sa iyang kinatibuk-ang 18 diha na sa final period, nga maoy nagtuboy sa national team aron pakgangon ang Chinese squad kinsa miduwa nga wala ang ilang mga sinaligan nga sila si Yi Jianlian ug Zhou Qi. Si Qi, ang seven-footer nga sentro, bag-o lang na-draft sa Houston Ro­ckets sa NBA sa niaging semana.

Sa ilang unang duha ka duwa, ang mga Pinoy gipanglubong sa Turkey ug Italy og tag 35.5 puntos. Gikuso-kuso sila sa Italy, 106-70, ug gilampornas usab sila sa Turkey sa niaging semana didto sa Is­tanbul, 103-68. Ang naturalized player nga si Andrey Blatche mitali og 14, 10 usab ang natampo ni Jeff Chan alang sa Gilas kinsa pormal nga mianunsyo sa ilang kompletong 12 ka mga players nga ma­oy mokombati sa Olympic Qualifying tournament sa Manila sa wala pa ang ilang duwa batok sa China.

Sila si LA Tenorio ug Calvin Abueva, maoy katapusang gipangtangtang sa final 12 lineup sa Gilas, hinungdan nga wala na kini paduwaa pa.

Ang back-to-back ni Romeo sa three-point area sa katapusang kuwatro minutos maoy nagwanang sa ilang kadaugan. Unang tres niini maoy nakapatabla, 63-63, ug ang ikaduha maoy naghatag labaw sa Gilas, 69-65, 2:28 minutos ang nahabilin sa duwa.

Wa makatiwas si Ranidel de Ocampo human kini ma-ejected sa second quarter uban sa laing Chinese player tungod sa mainiton nilang panagbikil.

Gikatakdang mobalik sa Pilipinas ka­rong adlawa ang Gilas human sa hapit tulo ka semana nilang training didto sa Europe.

Mga puntos:

Philippines (72) – Romeo 18, Blatche 14, Chan 10, Castro 9, Reyes 5, Fajardo 5, Pingris 3, Rosario 3, Norwood 2, Aguilar 2, Parks 1, De Ocampo 0. China (69) – Zhou 18, Zhai 15, Ding 11, Wang 9, Zhao 5, G. Li 4, Zou 4, Sui 2, Jia 1, Q. Zhou 0, M. Li 0, Guo 0, Kelambaike 0, Y Zhao 0.