SECTIONS
philippines
Thursday, August 05, 2021

Libuan mihatod ni Jaguar sa sam-ang

KAPIN sa 2,500 ka mga tawo ang ninghatod ni Jeffrey "Jaguar" Diaz sa sam-ang sa Calamba gikan sa ilang balay sa Barangay Duljo Fatima, dakbayan sa Sugbo kagahapon.

Si Diaz, 37, giila sa kapulisan nga numero uno nga drug lord sa Central Visayas, napatay sa "engkuwentro" sa Las Piñas City niadtong Hunyo 17.

Halos nahabwa ang tibuok barangay nga nitahod kang Jaguar busa nagsugwak ang mga tawo sa simbahan sa San Nicolas de Tolentino diin gipahigayon ang misa requiem, ala una sa hapon.

Sama sa nagkahiusa ang tanan human nanagsul-ob kini og itom nga t-shirt, dunay mga puting balloon ug daghang mensahe nga nasuwat sama sa “We love you Jaguard,” “We will miss you” ug uban pa.

Ang mga sakop sa media wala tugti nga makasud sa simbahan.

Human sa misa imbes isakay sa porlon ang iyang lungon, gialsa lang kini sa unom ka mga tawo ug gibaktas pai-ngon sa Calamba diin nagsunod ang daghang mga tawo.

Ang gilay-on sa Calamba gikan sa Duljo Fatima moabot og 1.7 kilometros.

Nag-una sa convoy ang mga lalaki nga naka motorsiklo ug gisundan sa drum and bugle corps nga daw sama sa naglubong og usa ka bayani.

Tungod sa prosisyon, nakamugna kini og grabeng trapik sa V. Ra­ma Ave. ug N. Bacalso Ave­.

Pag-abot sa lungon ni Jaguar sa sulod sa Calamba, naghuot ang mga tawo nga nahisama sa kahimtang sa Kalag-kalag ang sam-ang.

Nabutang ang mausoleum ni Jaguar sa kinatumyan sa sam-ang diin lisud kining tultulon. Kadto lamang kabanay ug mga higala nga gitugotan ang makaduol niini.

Human sa hingpit nga pagtumod sa lawas ni Jaguar, ang mga puti nga balloons nga dunay “We love you, Jaguar” hingpit nga gipalupad.

Usa sa mga nihatod ni Jaguar nga naghilak nagkanayon nga nasaya-ngan sa kamatayon niini sanglit kanunay siya nga mahatagan og hinabang bisan pa man sa iyang kasayuran nga gikan sa ilegal ang kwarta nga gihatag kaniya.

“Dako kaayo siya'g natabang namo ni mama, sir. Bisan og ingon ana na siya pero dili man ko motuo nga wala pa na siya moundang,” matod ni Nang Rosie sa Superbalita Cebu.

Naila si Jaguar sa ilang lugar nga mang gihatagon ilabi na panahon sa pasko diin ang matag pamilya hatagan og 10 kilos nga bugas humay ug grocery items.

Matag panahon sa pista usab ang matag balay hatagan og tag 10 kilos nga karneng baboy aron maghikay.

Apan usa sa mga lumolupyo sa Duljo Fatima nitug-an usab nga gibayran sila og tag P800 matag usa niadtong mohatod ni Jaguar sa sam-ang.

“Gipanglista mi didto. Gihatagan ko og P800, ambot lang katong uban kay kami naa man. Ayg saba akoy nag-ingon, sir ,ha,” sumala sa pipila ka residente nga ninghatod ni Jaguar sa sam-ang sa dihang nahinabi sa Superbalita Cebu.

Si Sr. Insp Regino Maramag, hepe sa Mambaling police station, niingon nga moabot ngadto sa 2,500 ka mga tawo ang mihatod kang Jaguar.

“Mayroon tayong personnel na pinadala doon at tumulong na rin sa traffic kase nagka problema na tayo sa traffic doon, eh,” matod ni Maramag.

Way bisan usa sa mga kabanay ni Jaguar ang nag pa-interview sa media gani dunay misinggit sa media nga walay tugotan nga makaduol sa iyang lubong.

Human nga gilubong si Jaguar tinguha karon sa Police Regional Office (P|RO) 7 nga limpyohan ang Duljo Fatima gikan sa bisan unsa nga hulga.

Matod ni Chief Supt Patrocinio Comendador sa Police Regional Office (PRO) 7 nga duna pay mga personalidad sa maong lugar ang nagtiner og mga armas nga mao karon ang ilang sunod nga himuon sa paghimong operasyon.

style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph