MAGPET, North Cotabato -- Kontrolado na ang diarrhea outbreak nga miigo niadtong adlaw nga Lunes, Hunyo 27.
Sa taho gikan sa North Cotabato Integrated Provincial Health Office nga 130 ka tawo ang nadala sa Cotabato Provincial Hospital gumikan sa diarrhea sa Barangay Don Panaca sa lungsod sa Magpet.
Kadaghanan sa mga biktima nakasinati og sobrang pagsakit sa tiyan, nagsuka-suka, ug nagkalibanga.
Matud ni Magpet Mayor Florenito Gonzaga nga nagpadala dayon sila og medical team sa maong barangay aron maatiman ang mga biktima ug dili na madungangan ang ihap sa mga molupyo nga ma-diarrhea.
Mikuha na og water samples alang sa laboratory test ang mga doktor sa mga balon nga gikuhaan sa mga biktima og tubig mainom nga posibleng maoy hinungdan sa diarrhea outbreak.
Dako ang pagtuo ni Mayor Gonzaga nga posibleng nakontamina sa hugaw ang tubig nga giinom sa mga biktima gumikan sa nasinating pag-ulan ug pagbaha sa lugar.
Ang Barangay Don Panaca anaa sa tiilan sa Mount Apo diin kasagaran sa mga namuyo mga netibo o indigenous tribal community.
Gitahasan mismo ni NorCot Governor Emmylou "Lala" Mendoza si Mayor Gonzaga nga tutukan ang sitwasiyon sa mga biktima sa diarrhea ug tabangan dayon, ilabi na sa mga nadala sa tambalanan. (Edgar E. Fuerzas)