Lunod sa bangka gihinumdoman

ORMOC CITY, Leyte- Gihinumdoman sa mi­a­ging adlaw ang unang tuig sa usa ka dakong trahedya sa kadagatan sa Ormoc.

Ang pagkalunod sa Mb Kim Nirvana B niadtong Hulyo 2, 2015 nga mikalas og 63 ka kinabuhi.

Presko pa gihapon sa panumdoman sa mga survivor ang trahedya, usa sa naluwas mao ang 48 anyos nga si Antonieta Wenceslao nga taga Ormoc.

Sakay si Wenceslao sa bangka padung Camotes uban sa iyang pamilya lakip ang walo ka buwang apo.

“Biyahe unta mi ato kay kaslunon ni akong anak nga lalake, pero wa madayun tungod sa trahedya,” matod ni Wen­ceslao.

Mas mipresko sa ilang panumdoman ang hitabo atol sa paghandum niini sa miaging adlaw. “Pagdayong yabo ato, milukso ko unya mi sawom ko unya mosaka naman, gikapyotan gani ko ato og dakong tawo ako giingnan nga ayaw ko kapyoti kay malumos ta,” matod ni Leonila Vergara.

“Diha gyod to oh (mitudlo sa kilid sa pantalan) grabeng daghang patay ang nagpasad,” matod ni Niño Alex Wenceslao.

Lakip sa 63 nga nakalas ang iyaan ni Niño nga si Lourdes.

Sa iyang mensahe, si Ormoc City Mayor Ri­chard Gomez miingon nga angay na nga moabante human sa hitabo ug maghuna-huna og unsay maayong buhaton.

“Sa mga sea vessels, kinahanglan ang sea worthiness nila, responsibility sa tag-iya, sa Coast Guard to check the sea worthiness to make sure nga di mag-overload ato mga bangka. Our responsibility sa mayor’s office sa city hall, we will make sure that we have adequate and strong disaster risk reduction team,” matod sa mayor.

Nangayo naman og tabang sa mayor ang survivor nga si Antonieta aron makuha ang insu­rance ngadto sa tag-iya nga si Joge Bung Zarco.

Si Coloy Tolibao sa CDRRM office niingon nga di kini simple nga pag­hinumdom kay niini makat-onan ang ka importante sa pagpangandam.

Gisugdan ang kalihokan sa usa ka pangad­ye ug gisunod ang paghalad og buwak sa mga nanambong sama sa PNP, Coast Guard, Rescue team ug mga opisyal sa dakbayan.

Alang sa mga survivor ug pamilya sa nakalas, di man mabalik ang kinabuhi sa mga mitaliwan apan pabiling buhi ang ilang paglaum nga makaba­ngon sila human sa dakong trahedya.