KAPIN sa P6 milyones nga kantidad sa shabu nga nasakmit sa mga awtoridad sa Mactan Cebu International Airport (MCIA) gikan sa usa ka babayeng Chinese national.
Ang shabu nga dunay gibug-aton nga upat ka kilo gitago sud sa malita sa turistang si Liming Zhou, 27, taga Hunan, China.
Si Zhou nga giila pinaagi sa iyang Chinese passport nakabisita na dinhi sa Sugbo sud sa makatulo ka mga higayon.
Si Zhou niabot sa Mactan airport kagahapon sa 11:25 sa buntag luwan sa Cathay Pacific Airways flight CX921 nga gikan sa Hongkong.
Base sa paghulagway ni Bureau of Customs (BOC) district collector Atty. Rico Rey Holganza nga sa dihang gipaubos sa scanning machine ang light blue nga malita ni Zhou, ilang nakita ang mga bugdo nga butang sa sud niini.
Sa dihang siya gipangutana kon aduna ba siyay ideklarar nga goods sa Customs, namalibad si Zhuo hinungdan nga ilang gipaablihan ang bagahe.
Niuyon ra sab ang siya nga buksan.
“Kon imong tan-awon, patag ra ang sud sa bag. So, gitagoan,” matod ni Holganza sa dihang nahinabi sa Superbalita Cebu.
Napugos og susi ang mga tinugyanan sa BOC sa sud sa maong maleta ilabi na nga mi-react ang canine dog sa pagsimot sa maong bagahe.
Sa dihang ilang gilaksi ang lining sa bag, makita nga adunay plywood nga gitabon niini.
Ilang gilangkat ang plywood ug didto, ilang nadiskobrehan naglaray ang 11 ka binulto nga gituohang shabu nga gibaatan og packaging tape.
Sa gihimong test sa sud sa mga pinutos, positibo nga shabu ang gidala ni Zhou.
Kini nitimbang og 4.052 kilos.
Kalapasan sa Comprehensive Dangerous Drug Act kun illegal nga paghupot og illegal drugs ang atubangan ni Zhou.
Si Zhuo nga maglisod sa paglitok sa pinulongang Ingles gipresentar sa mga tigbalita ug gibasahan sa Miranda Rights sa usa ka sakop sa Aviation Security Unit (AVSEU)7 nga gihubad ni Mariano So, usa ka Chinese interpreter.
Igo nalang sa pagtiyabaw ang dinakpang langyaw nga niingon nga; “I dunno (I don’t know)!”
Base sa inisyal nga imbestigasyon sa AVSEU nasuta nga ikatulong higayon na ni Zhuo nga mibiyahe dinhi sa Sugbo sud ning tuiga gikan niadtong Marso, Mayo ug ning buwana.
Kanhi siya nurse apan wa na siya manarbaho.
Matod niya nga igo lang siyang gisugo sa paghatod sa maong malita dinhi sa nasud gikan sa usa ka Canadian national nga higala sa iyang ig-agaw sa China.
Nasuta nga adunay mosugat kang Zhuo sa airport nga mga Pinoy, usa niini lalake ug duha ka mga babaye.
Dad-on siya sa usa ka hotel sa Lapu-Lapu nga maoy iyang istaran sud sa tulo ka adlaw sa di pa mobalik sa China.
Atol niining pagsuwat, nagpadayon ang imbestigasyon sa AVSEU kang Zhou, kinsa kasamtangang itanggong sa airport police stockade.
Pipila ka mga adlaw ang nakalabay, si Presidente Rodrigo Duterte nangutana sa China kon nganong sagad sa dagkong mga drug operator sa nasod mga Chinese national.
Ang Chinese Embassy sa Manila niingon nga andam silang makigtambayayong sa Pilipinas sa kampanya batok sa ginadiling drugas.