MOBIYAHE karong adlawa si Mayor Tomas Osmeña uban sa iyang asawa nga si Margot paingon sa Japan aron adto isaulog ang ilang adlaw nga natawhan ug ang ika-33 nga anibersaryo sa ilang kasal.
Si Tomas natawo niadtong Hulyo 26 1948 samtang Hulyo 25, 1949 si Margot.
Mao kini ang labing unang higayon nga ilang gisaulog ang ilang adlaw nga natawhan gawas sa nasod ug pulos usab sila elected official sa dakbayan.
Ang Department of Interior and Local Government (DILG) niaprub sa leave of absence sa managtiayon gikan Hulyo 23 hangtod 28 diin gikatakdang silang mobalik og trabaho sa Hulyo 29.
Paglabay na usab sa usa ka semana, sugod Agusto 4 hangtod sa 14, mobiyahe na usab ang magtiayon paingon sa United States of America (USA) para sa tinuig nga check-up ni Tomas sa iyang gall bladder nga gideklara sa mga doktor sa MD Anderson Medical Center nga cancer free.
Atol sa pagsuwat ning balita, wala pa mapirmahi kon si kinsa ang itudlo ni Osmeña nga maoy iyang tugyanan sa pagdumala sa siyudad samtang wala ang iyang presensiya sanglit dili siya mosugot nga si Bise Mayor Edgardo Labella nga kaalyado sa Team Rama ang moasumir.
Apan matod pa ni Labella nga itudlo man siya o dili ni Tomas, kinahanglan siyang molingkod isip acting mayor sanglit mao kini ang nalatid sa Local Government Code of 1991.
Usa ka manlalaban nagkanayon nga dili mahimong motudlo si Osmeña og acting mayor gawas sa bise mayor sanglit gawas sa nasod ang iyang biyahe.
Mahimo siyang mobilin og office in-charge kon anaa ra sa Pilipinas ang iyang lakaw ug dili molapa sa tulo ka adlaw.
Apan sa sitwasyon sa kagamhanan sa siyudad sa Sugbo iyang gihulagway nga dili mahitabo ang gusto ni Osmeña sanglit mao kini ang gisulat sa balaod.