SAMTANG ang unom ka national athletes, kinsa wa nagbansay sa abroad, molupad na kauban ang delegasyon karong Sabado sa gabii aron makitigi sa 2016 Rio Olympics sa Agosto 5 hangtud 21 didto sa Rio de Janiero sa Brazil, si three-time Olympian weightlifter Hidilyn Diaz miingon nga mas andam siya karon nga moduwa.
Sa Facebook chat niadong Sabado, ang 25-anyos sa Zamboanga City, miingon: “Nakakakaba po pero excited. Mas prepared ako dito at kasama ko si God sa Olympics na to. Mas naniniwala ako sa sarili ko ngayon.”
Nakakuha og puwesto si Diaz sa Rio human nakasungkit og tulo ka bronze medal sa International Weightlifting Federation World Championship sa Houston.
Sa 2012 London Olympics, nakuwalipikado sab siya pinaagi sa rankings ug wildcard entry sa 2008 Beijing Olympics.
Matud pa niya nga si President Rodrigo Duterte nga nag-send off sa ila niadtong Hulyo 18 didto sa Rizal Hall sa Malacañang Palace ang mas nakahatag og dugang kumpiyansa sa ikatulong pakigtigi sa Olympic.
“Sobrang laking bagay, na-boost niya confidence at morale namin,” ni Diaz sa SunStar Davao diin ang Presidente nangutana kung asa sila gikan tanan.
Gipahimuslan sab niya ang higayon nga makighulagway sa Presidente Duterte human sa send-off rites.
Makita si Diaz sa Agosto 7 sa women’s 53 kilograms division.
Siya nanawagan sa tanan, “Please watch and support sa aming mga athletes na maglalaro sa Olympics and include us in your prayers.”
Makauban niya sila golfer Miguel Tabuena, table paddler ug flag bearer Ian Lariba, taekwondo Jin Kirstie Alora, long jumper Marestella Torres-Sunang ug fellow weightlifter Nestor Colonia.
Sila boxers Charly Suarez ug Rogen Ladon kasamtangan nagbansay sa Washington D.C. samtang Cebuana marathoner Mary Joy Tabal nag-training sab sa Japan.
Si Fil-Am Eric Shauwn Cray (400m hurdles) ug swimmers Jasmine Alkhaldi ug Jessie Khing Lacuña ang mikumpleto sa delegasyon kauban ang ilang coaches ug officials ug staff sa Philippine Olympic Committee ug Philippine Sports Commission.