NIBALIK na sad ang sakit sa mga hurado sa Tawag ng Tanghalan (TNT) sa “It’s Showtime” nga gamayng sipyat sa defending champion ila dayong hulipan.
Sukad napildi ang 8-time defending champion nga si Jennie Gabriel two weeks ago, sige na lang silag ilis og defending champion. Mao nang i-bash sila pirme sa mga Netizen.
Pareho gud atong Pauline Agupitan sa una niyang apil sa TNT nga bisag maayo kaayo ilang gitagak. Gibirahan bitaw sa social media, da, pagbalik ni Agupitan pasok lagi sa grand finals.
Ambot bitaw ani ilang mga judge nga dali ra kaayo mada sa ilang gibati, naa gani silay bag-ong ganahan ila dayong ilisan ang kampiyon bisag maayo.
`Home’
Kadtong ilang defending champion nga taga-Cagayan de Oro nga si Edilisa Neri kamaayo nikanta og “Home” ni Diana Ross gilupig man hinuon sa taga-Cebu nga si Jennon Juarbal.
In fairness, maayo sad si Juarbal pero mas nindot og aksento ug dynamics si Neri ug mas lisud ang piyesa nga “Home” no kumparar sa “Cry Me A River.”
Si Juarbal napildi ra sad dayon sa half-African half-Pinoy nga si Garreth Bolden. Sa ikaduhang depensa ni Bolden, gilupig pud siya sa Airport Diva nga si Janneth Gomez nga mubo man intawon tog tingog uy.
Pagkasunod adlaw, nayabag si Gomez mao ang challenger bisag di maayo mao na lay gipadaug. As expected, pagkasunod adlaw, nag-ilis na sad sila og defending champion. Pastilan. Ako na lay judge beh! Hehe…
Tribute sa OPM
Dalaygon ang gihimo sa ABS-CBN nga hatagan og tribute ang mga karaang kompositor nga dako og natampo sa OPM (Original Pilipino Music). Human ni anhing Levi Celerio, si Willy Cruz na sad ang ilang gipasidunggan niadtong Dominggo sa ASAP.
Apan maila nga dunay gihambin nga sakit ang 69-anyos nga si Willy Cruz tungod kay daut ug luspad ni karon. Maorag nayungit sad siya.
Si Cruz, kinsa daghan kaayong sikat nga komposisyon sama sa “Let the Pain Remain”, “Araw-araw gabi-gabi” ug “Bituing Walang Ningning” nabalita niadto nga nahulog sa swimming pool nga walay tubig maong gioperahan tungod sa pelvic fracture.
Sigon sa report sa Inquirer niadtong 2005, nisaka ang sugar level ni Willy Cruz maong nakuyapan ug tayming didto siya nagbarug sa iyang pool nga way tubig. Sa wala pa ang maong disgrasya, si Cruz giatake sad sa mild stroke.
Stephanie's Concert
Sa mga nangutana sa atong free tickets promo sa concert ni Stephanie sa Waterfront Hotel, ang deadline karong Agusto 20.
Gawas sa free tickets makadawat sad mo og free CD album ni Stephanie nga gi-composed tanan ni Vehnee Saturno (except sa English song nga personal nga gitagik ni Stephanie).
Matod sa “Yaya ng mga artista” nga si Aida Patana andam na ang tanan lakip na ang hotel nga puy-an nilang Alden Richards, Daniel Matsunaga, Manolo Pedrosa, Anna Fegi ug Dulce nga maoy guests sa Centerstage Concert ni Stephanie karong Agusto 28, Dominggo.
Gikan sa sound, technical staff ug stage production hangtod sa banda ug local artists, daghan kaayong nahatagan og trabaho si Ms. Aida kay gusto niya nga malipay kuno ang tanan. Laysho!
Mga buotang anghel
Akong kinasingkasing nga mga pahasubo sa banay ni Ben Roque ug sa atong kauban sa buhat, Orly Cajegas nga parehong nitaliwan na sa laing kalibutan.
Si Roque naila nga singing champion sa kasikatan niadto sa dyRC amateur singing contest sa dekada `80 nga nakauban sad nato niadto. Samtang si Orly kanhi Lifestyle writer sa Sun.Star Cebu ug Cebu Daily News nga mahinumdoman sa iyang pagkamahigalaon.
Kahinumdom ko ni Orly nga mao gyuy nitabang aron makakuha og nindot nga gown ang akong interpreter sa Cebu Pop nga maoy nahimong kampyon niadtong 2004. Siguradong nanag-ambahan na ang kalangitan sa paghiabot sa mga buotan niyang anghel.