Nalpasen ti umuna a SONA, State of the Nation Address ni Pres. Duterte... ania ngata ti sumaganad? Tumapok ngatan dagiti planona? Sabagay iti daytoy a kasapa... nangrugin a marikna ti karadikad dagiti planona a kas naikarina idi sakbay ti eleksiyon. Katugtugawna pay laeng... pilapilan dagiti simmuko a users/pushers iti illegal a droga. Pila met dagiti nakusbo. Adda kinusbo dagiti otoridad gapu ta limmaban. Adda met dagiti nakusbo babaen kano kadagiti vigilante a grupo. Ngem adda met dagiti nakusbo a saan kano a nakappapati. Kasla adda kano killo a napasamak. Dagita ita ti kayat nga maimbestigaran idiay Senado a gakat ni Sen. De Lima. Adda umanamong. Adda met kontra iti plano a kasta. Ngem no dakayo ti pagamadanmi... ania ti makunayo? Rumbeng kadi a maimbestigaran dagiti pammapatay a nagameran kano iti pattapatta wenno suspetsa nga adda foul play-na? Kuna met dagiti otoridad... trabaho lang. Limmabanda, natural, agdepensada kano. Kinapudnona, adda dagiti napapatay a sigud a pulis, agdama a pulis ken naikkaten iti puestoda gapu iti droga. Idiay laeng Quezon City, nasurok iti walupulo ti nasibak wenno naikkat iti akmenda gapu iti droga. Adda pay nangato nga opisyal dita ti napapatay (ta limmaban) idi mariput daytoy iti imetna a droga. Tsk tsk! Kasla saan a nakappapati..ngem pudno nga adda gayam dagiti otoridad a bimmaknangen gapu iti illegal nangruna iti droga. Dayta ita ti matmataan ken sisiimen ken banbantayan ti Duterte Administration.
******
Arasaas: ania ngata ti pudpudno a rason... apay nga adun dagiti simmuko a users ken pushers? No ipraktikaltayo ti agarisit, adu dagiti mabalin a rason. Kalpasan iti intay panagam-amad ken panagal-allingag, nasagattayo dagitoy sumaganad a rasones nga ammomi nga anomonganyo: umuna a rason... kayatda kano ti agtulnog iti kiddaw ni Pres. Duterte panggep iti panangabaruanan. Maikadua, agtalekda iti sao ken kari ti Duterte Administration iti panagbalbaliwda. Maikatlo... agamakda amangan kano ta isuda ti maisaruno a matumba wenno makaluban iti diaryo iti walwalang. Maikapat a rasonda ket agamakda a maireportda a user wenno pusher babaen met laeng kadagiti immunan a simmuksuko. Adda met nagkuna a nabannogdan nga aglemlemmeng iti usig ti linteg. Kuna ti dadduma... itada laeng a nakarikna iti panagbabawi ken pannakaawat nga illegal ti sinerrekda nga aramid. Ita laeng a nakitada ti kinaadun dagiti nabiktimada iti sosyodad. Dida kanon mairusok pay a manayonan dagiti mairareb iti droga. Adda met dagiti kayatdan ti agbuelta iti desdes a tinurongda ita ta nasapa pay. Adda met kano dagitay simmuko gapu ta agpeggaden ti biagda manipud iti ima dagiti met laeng nangaramat kadakuada... mabalin nga otoridad wenno sindikato. Dagitoy ket sumagmamano laeng kadagiti nakalaptayo a rason. Ngem iti timbangantayo... amak ken respetoda kenni Pres. Duterte ti kadagsenan a rason iti inda panagsuko iti linteg. Agsaludokami !
******
Idi SONA, absent ni sigud a president Noynoy Aquino. Adda sayangguseng idi a saanna kano a mairusok a makasango wenno makita ni sigud a president Gloria Arroyo. Nupay adu dagiti komento panggep iti daytoy... inurayda laengen ti gundaway a mabalinda manen nga agsarak. Nagsarakda met laeng idi National Security Council meeting sadiay Malakanyang nga inangay ni Pres. Digong. Ti banglesna... di man laeng linamano wenno iniseman koma ni Noynoy ni Ate Glo. Arasaas: mabain ngata gapu ta uray impakulongna ni Ate Glo... nawayawayaan babaen iti Korte Suprema? Aniaman ti rasonna... awanen ti biangtayo dita. Ngem ti laeng tapiktayo: kumo agpadada met a nagpresidente... impakitada koma iti sangapagilian nga isuda ti pagmodeloan. Malagipmi pay ti entrada ti SONA ni Apo Digong: ti takderna ken ti administrasyonna ket saan a magameran iti panagibales wenno benggansa no di ketdi pammateg iti panagkaykaysa iti amin a kagimongan. Saan ngata a napalek dita a mensahe ni Noynoy, damagda. No intay ngamin lagipen iti napalabas nga ennem a tawen a panagtakemna... kanayon dagiti pammabasolna iti naglabas nga administrasyon. Kanayon a mayungitna a ti laklak-amen ti Aquino Administration ket tawidna. Tsk tsk. Kasano ngarud a makapagserbisyoda iti sangapagilian? Dida ngata makonsensiya iti ar-aramiden ita ni Pres. Duterte nga arig aminen a kampo-militar iti sangapagilian ket innan ronrondaen... banag a saan a naaramid ti naglabas nga administrasyon? Haay naku... only in the Philippines. Sabagay, kas konsolasyon, awan ti daplis da FVR ken Erap iti karirikna da Noynoy ken GMA. Suhestiyon: dakayo ti pagmodeloan ti pagilian kas pinatugawmi a panguluen iti naglabas a panawen... dikay koma dadaelen dayta nga imahe gapu laeng iti personal a rason. Tulonganyo ketdi ni Pres. Digong tapno mas natibtibkerton ti pondasyon ti pagilian para iti sumaganad a henerasyon.
******
Iti kallabes a SONA... napunas ti kanayon idi a kasla fashion show dagiti agtuturay ken sangaili. Pinnagarbuan wenno pinnanginaan iti suotda. Arigda amin iti kasla artista wenno reyna iti piyesta. Kasla pinnasikatan a mangipakpakita iti estadoda iti kagimongan. Tsk tsk... imbag laketdin ta saantayon a nasaksian dayta iti umuna a SONA ni Pres. Digong. Simple ti inaruatda a mas nangyasideg kadagita nga opisyal iti kinataoda kadagiti umili a simmaksi iti nasao a tallaong. No ninto pay Digong ket kabaelanna ti agsuot iti MAONG... isudanto ketdin? Ti impakita ti nakuna nga eksena ket kinapakumbaba nga adayo iti kasisigud a kinaparammag. Malagipko pay idi panawen ti kampanya... adu kadagiti kandidato ti arig bimmatok iti kapitakan tapno maipakitada laeng iti pang-masa-kuno a riknada kas pangallawitda iti butos. Ngem ita ta nakatugawdan... ayanda ngatan? Kabaelanda ngata manen ti agsubli kadagiti sulinek nga inasakda idi panawen ti lamano ken abrasa? Dayta ita ti sentro ti siim ken sipot nga aramiden dagiti umili. Dita nga agkurri ken maaramat ti inlatang ni Pres. Duterte a pamay-an. Daytoy ti 8888 SUMBUNGAN NG BAYAN. ..a suportaran ti 911-EMERGENCY LINE! Sapay koma ta babaen kadagitoy ket maripot ken madusa dagiti agar-aramid iti anomalya iti akmenda iti kagimongan. Ti laeng peggadna..amangan ta adda dagiti aglablabes met a mangaramat iti 8888 tapno mabalesna laeng dagiti kabusorna. Dakkel ti posibilidadna a maabuso ti nasao a programa ni Digong. Masapul iti natanang a panagawat ken panagamiris kadagiti darum amangan ta dagitoy ket adda mangidurduron a motibona. No mapasamak ti kastoy... imbes a masolbar dagiti parikut, ad-adda a rumikut. Sutil: amangan ta ultimo saan a nakasingir iti pautang... itawagdan iti 8888. No sibibiag ni lolok... agtext a sigida: irreklamona iti ikukuttongna gapu iti sisid-marino ni lolak... he he..joke! ...Sapay koma ta no adda man dagiti agabuso... adda nakasagana met koma katukadna a pannusa. Bitay, este..tay nadagsen met koma a dusa tapno agnakem dagita a mannibrong!
******
Adu pay dagiti nainpanawenan nga isyu iti agdama kas koma iti unilateral ceasefire iti baet ti gobyerno ken CPP-NDF-NPA; West Phil. Sea issue; SSS increase iti pension; BBL ken panagdur-as ti Mindanao; Transportation problems; Pannakapapartak ti serbisyo dagiti ahensiya ti gobyerno kontra pila ken red tape; Gun renewal, Drivers license, NSO records, DFA requirements ken adu pay a naparikut a serbisyo-gobyerno ti maritobar para iti naparpartak a proseso. Kinapudnona, narugianen a maimplementar dagiti gannuat. Suportarantayo laengen. Kurangen ti espasyo... adios mi amor, ciao, mabalos!