KARONG adlawa, Agosto 1, mao ang ika-68th nga kasumaran sa opisyal nga pagmugna sa Lungsod sa Governor Generoso, probinsiya sa Davao Oriental.
Duha ka tuig human namugna ang Republika sa Pilipinas niadtong 1946, gipirmahan ni Presidente Elpidio Quirino ang Executive Order 156 aron opisyal na nga mahimong lungsod gikan sa Sigaboy ngadto sa Governor Generoso, in honor of former Davao Governor Sebastian Generoso.
Ang unang appointed mayor mao ang iyang igsuon nga si Ramon Generoso.
Apan wala dinhi manukad ang kasaysayan sa maong lungsod nga karon nagsaulog na sa ika-68 ka tuig.
Ang pulong Sigaboy, gikuha kini sa kalayo nga nagsiga nga nagpormang baboy nga sa karaang panahon gitawag og Santilmo.
Nag-uros-uros nga kalayo nga nakita sa mga netibo paingon sa isla sa Tibanban, hangtud nga gitawag kini nila og Sigaboy, siga nga nagpormang baboy.
Niadtong Nobyembre 16, 1914, girekomenda na kini ni Governor General R.E. Mcfie, pinaagi sa provincial board session with treasurer Francisco Bangoy.
Sa katapusan niadtong Pebrero 21, 1921, gipirmahan ni Governor General Francis Burton Harrison ang Executive Order 8, ang pagmugna sa Sigaboy Municipal District kon diin nasakop ang La Union paingon sa Luzon ngadto sa Surop ug cape San Agustin.
Ang lungsod sa Governor Generoso adunay total area nga 365.75 (141,42 sq m base sa 2010 national census, adunay 50,372 ang iyang population.
Makapadani sa mga turista ang mga talan-awon sa lungsod ilabi na ang zigzag road paingon sa Barangay Monserat ngadto na sa katapusang barangay nga mao ang Lavigan.
Bisan tuod og giguba sa Davao Enterprises Corporation (Davencor) ang kalasangan sa Gov. Generoso niadtong Dekada 60 ngadto sa 70, apan nagpabilin nga gipreserba ni Mayor Vicente “Inting” Orencia ang Almasiga nga maoy bugtong ikapaghambog sa maong lungsod.
Karong adlawa, daghan og bisita ang lungsod sa Gov. Generoso gikan sa Davao City, ug sa mga silingang lungsod sa probinsiya sa Davao Oriental.
Aduna silay Almasiga Festival, Indak-indak sa daan, ug uban pang mga kalingawan nga gitagana sa mga bisita.
Ang pagsa-ulog sa ika-68th nga kasumaran sa lungsod ubos na sa pagdumala ni Mayor Katrina Joy Orencia, ug ni Vice Mayor Vicente “Inting” Orencia ug walo ka miyembro sa Sangguniang Bayan.
Ang kasaulogan sa ika-68th nga kasumaran sa lungsod sa Gov. Generoso, gitambungan sa iyang 20 ka mga kapitanes gikan sa Barangay Manuel Roxas paingon sa Barangay Lavigan.
Mabuhay 68th Araw ng Governor Generoso today, August 1. Padayon sa pag-uswag!!