MOKABAT sa 204 ka mga piniriso sa Misamis Oriental Provincial Jail (MOPJ) ang gipapanumpa atubangan kang Misamis Oriental Governor Yevgeny Emano ug Misamis Oriental Provincial Police Director Police Senior Superintendent Manuel Alvarez.
Gibutyag ni MOPJ Jail Warden Dominador Tagarda nga mokabat sab sa 20 ka mga babae niini ang lakip sa nalambigit sa druga nga manumpa ug mipasalig nga dili na molambigit pa og ginadili nga druga sulod sa prisuhan.
Gitawag ang programa og Oplan Katok Selda tungod kay kini nga proyekto daw walay kalainan sa Oplan Tokhang kon toktok hangyo nga gipatuman sa kagamhanan.
Unod sa gipanumpaan mao ang dili na motulak ug mogamit og druga sulod sa selda.
Matud ni Tagarda nga ang mga nanumpa maoy sagad sa nakuhaan og ginadili nga druga human sa upat ka hugna nga oplan greyhound sulod sa selda katulo niadtong bulan sa Hunyo ug kausa sa bulan sa Hulyo diin miresulta sa pagkakuha sa mokabat 45 ka pakete sa ginadili nga shabu nga gibana-banang mobalor og P39 mil.
Aron usab nga malikayan na nga makasulod sa selda ang mga ginadili nga druga ug uban pang kontrabando lakip sa lakang nga gihimo sa MOPJ mao ang pagsuspenso sa dalaw, pagpaubos sa mga piniriso sa random drug testing ug lakip niini ang pag monitor sa personahe nga dili mag uniporme sulod sa premises sa MOPJ.
"Kung mosubay lang sila sa programa ug mosubay sa insaktong pamalaod mabitibit gayod nila hangtod sa ilang pag-uli ang ilang sinumpaan," butyag ni Tagarda kinsa mipasalig pa nga irekomendar sa ilang mga tagsa-tagsa ka barangay nga mibiya na sa druga ang maong priso.
Apan mibahad kini nga kun dili mohunong, awtomatikong imbalido ang ilang mga gipanumpaan.