SA imbestigasyon sa 2001 nahugno si Kongresista Tony Cuenco sa House Committee on Dangerous Drugs sa DOJ, NBI ug PNP nga napakyas pagtabang sa pagkuha og dugang mga ebidensya aron pagpalutaw sa kamatuoran kinsa gyod nga Peter Lim. Nagdumili ang DOJ pagpalig-on sa ebidensya samtang ang NBI ug PNP wala makigtambayayong sa International Police nga matoltolan ang usa ka Bary Lou alias Peter Lim nga dakong druglord. Napukaw ang maong pasangil sa dihang gibutyag ni Presidente Rodrigo Duterte nga si Peter Lim nalakip gihapon sa magpapatigayon nga gilambigit sa drugas. Adunay 4,000 ka Peter Lim lukop nasod, 110 kanila nia sa Sugbo, 400 sa talaan sa NBI ug upat ang narehistro sa Comelec. Adunay Peter Co Lim, Peter Lim alias Jaguar ug Bary Lou alias Peter Lim.
Sa House inquiry sa 2001 sila si Ananias Dy ug Bernard Liu nga kanhi mga empleyado ni Peter Lim sa Hilton Industries mibutyag nga si Lim nagpadala og ilegal nga drugas sa nagkalain-laing dapit sa nasod. Apan wala mosalir kay wala moabag ang DOJ, NBI ug PNP pagpalig-on sa testimoniya nila ni Dy ug Liu.
Si Lim nga nakigkita ni Presidente Duterte gibaharan nga patyon kon mamatud-an nga druglord. Gimandoan nga modangop sa DOJ, NBI ug PNP alang sa inbestigasyon. Apan dakong insulto sa kawsa sa administrasyon ang mga misurender nga mibalik sa bisyo ug pamaligyag shabu. Dakong insulto ang gihimo sa unom ka mga polis sa Mabolo nga nangilkil. Kining nagpadayon nga pagpayuhot nga gani dunay kapin sa P6M nga kantidad sa shabu nga nasakmit sa mga awtoridad sa Mactan Cebu International Airport gikan sa Chinese National nga si Liming Zhou, 27, taga Hunan, China. Kinsa kahay druglord dinhi sa Sugbo nga kanunay niyang hatdan sa maong drugas?
Nunot gihapon sa kawsa sa pamunoan paglutos sa naghitak nga drugas gilusad ang halapad nga lahugay sa kapolisan ug paghulip sa mga nagdumala sa mga bilanggoan pinaagi ni PNP Chief Gen. Ronald Bato dela Rosa. Butang nga nahiubsan ni Cebu City Mayor Tomas Osmeña. Nasagmuyo nga gihulipan sila si PRO7 Dir. Chief Supt. Pat Comendador, CCPO Dir. SSupt. Benjamin Santos, PSupt. George Ylanan ug PSupt. Rex Derelo. Sa kasuko ni Osmeña gibakwi ang paghatag og reward system sa kapolisan nga makapatay og durogista, dili na manginlabot sa kalihokan sa PNP, gibawi ang armas nga iya sa city hall nga giapod-apod, gitangtang ang suporta sa anti-drug operations ug kriminalidad ug wala ihinayon ang paghatag og mga sakyanan. Sa 91 porsento nga trust rating ni Duterte namansahan ang tipik niini ni Mayor Osmeña, Sen. Leila Delima, sa simbahan ug Commission on Human Rights. Gamay nalang ang nagtikaw-tikaw nga miyamiid sa matang sa pagdisiplina ni Duterte.
(csa_1156@yahoo.com/0905-250-4643)