MONKAYO, Comval Province -- Tulo ka mga sundalo ang namatay samtang laing siyam ang samaran ug usa ang missing atol sa engkuwentro batok sa mga rebeldeng New People's Army (NPA) sa Kilometro 56, Barangay Rizal, alas 7:50 sa buntag, Biyernes.
Sumala sa taho sa awtoridad, naglusad og Focus Military Operation ang Scout Platoon sa 25th Infantry (Fireball) Battalion, Philippine Army, ubos sa pagpanguna ni First Lieutenant Israel Damasco sa maong dapit.
Apan gikahibalag sa mga sundalo ang dul-an sa 60 ka mga miyembro sa Secom 20, Southern Mindanao Regional Command, New People's Army ubos sa pagpanguna ni Alyas Pil.
Milanat og 45-minutos ang binakbakay diin naangol si Lt. Damasco ug lain pang walo ka mga sundalo.
Samtang tulo sab ang namatay sa giyera ug usa ang na-missing.
Nahanaw sab sa encounter site ang tulo ka R4 rifle ug 2 ka grenade launcher nga gipanag-iya sa militar.
Mga samaron nga sundalo daling gidala ngadto sa Camp Panacan Station Hospital sakay sa helicopter aron nga katambalan.
Sa interbyu sa SuperBalita sa usa ka nagpakabanang lungsoranon sa lugar nga wala magbutyag sa pangalan, siya nagkanayon nga usa ka sundalo ang gilaslas ang liog.
Hinuon wala pay kompirmasyon niini ang hut-ong sa kasundalohan.
Sa uwahing report, giingon nga tulo ka NPA ang nadakpan samtang usa ang napatay sa militar.
Samtang gisuwat kining balita, padayon pa ang military operation sa maong dapit.