EMOSYONAL nga nagbitbit og Qur’an si Fahad “Pre” Salic, kanhi mayor ning dakbayan sa Marawi, samtang nakig-istorya sa mga reporter sulod sa iyang gamayng payag sa usa ka layo ug mingaw nga dapit sa Marawi niadtong niaging adlaw.
Kini aron ihimakak ang pagkalakip sa iyang pangalan, sa iyang igsoon ug usa ka pag-umangkon sa kalihukan sa ginadiling droga base sa mga gibasa ni Presidente Rody Duterte niadtong nakalabayng gabii.
Nalakip ang pangalan ni Salic, sa iyang igsuong si kanhi Mayor Omar Solitario ug pag-umangkon nga kasamtangang bise mayor sa siyudad nga si Arafat Salic, sa 158 ka mga personalidad nga naa sa gigunitang listahan sa presidente nga, matud pa, adunay kalambigitan sa ilegal nga droga sa nasod.
Miingon si Duterte nga ang maong listahan, miagi na sa makuting balidasyon gikan sa ‘intelligence group’ sa mga hintungdang ahensiya.
Sa maong gidaghanon, 52 kanila ang mga kasamtangan ug kanhiay mayor ug bise mayor.
Si Fahad ang nakahulip kang Solitario paghuman sa iyang tulo ka termino niadtong tuig 2013.
Natapos usab niini ang tulo ka termino ug niadtong 2016 nga piniliay midagan kini pagka-gobernador sa Lanao del Sur apan wala midaog.
Iyang ka-tandem isip bise gobernador si kanhi Marantao Mayor Mohammad Ali Abinal nga una na’ng misurender niadtong nakalabay’ng semana.
Nalakip usab si Abinal sa listahan ni Duterte.
“Masama ang loob ko na nasali kami dito ng aking kapatid at pamangkin. Mula’t sapul ay hindi pa ako nakatikim o nakapagtinda ng kahit ano’ng klaseng (illegal) drugs, maliit man o malaki,” matud pa ni Salic.
Dugang ni Fahad, bisan makig-istorya o makig-transaksiyon sa mga tawo nga nalambigit sa ilegal nga droga o modawat og salapi nga gikan sa ilegal nga droga ang wala niya gihimo.
“Ako ang gumawa nang paraan upang matigil ang illegal na droga sa Marawi noong mayor pa ako. May mga kamag-anak ako na namatay dahil sa operation laban sa illegal na droga,” miingon si Salic.
Tungod niini, miapela ang kanhi mayor sa Marawi ngadto kang Presidente Duterte ug kang Philippine National Police Chief Ronald Dela Rosa nga pa-imbestigahan pag-ayo ang iyang listahan tungod kay dili lamang ang iyang pamilya ug mga kabanay ang naapektuhan niini apan lakip na ang iyang pagpanerbisyo sa gobyerno.
Nagtuo si Salic nga ‘politically-motivated’ ang paglakip kaniya sa listahan.
“Tapos na ang pulitika, hindi na dapat balikan,” miingon ang kanhi mayor.