WAY angay ikaalarma ang giingong pagtakodtakod sa nangasakit nga mga molupyo sa Barangay Lamac, lungsod sa Pinamungajan nga gidudahan nga natakbuyan og chikungunya, usa ka sakit nga ang virus makuha pinaagi sa paak sa lamok.
Si Dr. Sheila Faciol, municipal health officer (MHO) sa Pinamungajan, nibutyag nga wala na mapun-i ang 95 ka mga tawo nga nangasakit.
Ang uban nagsugod og kasakit duha ka semana na ang nakalabay ug nitakod ngadto sa uban.
Matod niya ang nangasakit nga mga residente gipanghilantan, adunay nanurok sa lawas, nanakit ang kasokasohan ug naglabad ang ulo nga pipila ka sintomas sa chikungunya.
Ang mga timailhan ug simtomas sagad mogawas duha ngadto sa pito ka adlaw human mapaaki og lamok nga nagdala sa kagaw.
Way nalandig sa tambalanan o nakabsan sa kinabuhi sa sakit, matod ni Pinamungajan Mayor Glenn Baricuatro.
Ang mayor ug si Faciol niklaro nga wala pa makompirmar nga chikungunyan ang niigo sa mga molupyo nga sama usab sa dengue nga lamok ang tinubdan sa kagaw.
Ang Regional Epidemiology and Surveillance Unit sa Department of Health pinanguluhan sa regional epidemiologist nga si Rennan Cimafranca, nagpahigayon na og fogging sa apektadong lugar kagahapon ug magpadayon karong adlawa.
Si Cimafranca nipasabot ngadto ni Faciol nga fogging ang ilang gihimo inay misting tungod kay mabanlas ra sa tubig ang sangkap nga gamiton sa misting labi na kay nagsige og uwan.
Ang nangasakit sagol bata hangtod sa hamtong, ang nakuhaan na og blood samples sa miaging semana ug napadala na ngadto sa Research Institute for Tropical Medicine (RITM) sa kaulohan.
Si Faciol niingon nagpaabot sila sa resulta sa eksamin sa dugo nga gi-examine usab sa chikungunya, dengue, ug Zika virus. Una kini nagnegatibo sa tipdas ug German measles.
Ang Lamac, usa ka bukirang barangay sa Pinamungajan, nga 15 ka kilometros ang gilay-on gikan sa poblacion sa lungsod diin daghan ang nanimuyo, dugang ni Baricuatro, diin wala na makatabok sa kasikbit nga barangay ang sakit.
Ang mayor nihatag og gibug-aton sa kanunay nga pagpanglimpyo sa mga molupyo sa ilang palibot.
Matod ni Dr. Niño Ismael Pastor, labaw sa public health sa Provincial Health Office, dali matubag ang sakit kon dali kini nga na-detect o nabantayan.