ANG lungsod sa Cordova, gipanguluhan ni Mayor Therese “Teche” Sitoy-Cho, nagadapit sa tanan sa pag-tan-aw sa ika-17 nga Dinagat Festival celebration nga kabahin sa kapistahan sa patron sa lungsod nga si San Roque.
Karong tuiga, ang Cordova Public College ang nagdumala sa selebrasyon. Tema sa Dinagat Festival karong tuiga ang: “Ang walay kinutubang kaluoy sa Diyos, Maglig-on sa pamilya dinha sa Eyukaristiya.”
Ang mga contingent nga gikan sa nagkalain-laing eskwelahan ug barangay mopasundayag ug mas bongga nga selebrasyon. Sila magsangka alang sa street dancing ug interpretative dance competitions.
Ang Dinagat Festival nagpakita sa lihok sa mga mananagat nga maoy nag-unang panginabuhian sa mga Cordovanhon.
Ang Dinagat Festival nahilakip sa Philippine Festivals and events sa Department of Tourism. Giusab kini ug nahimong Dinagat/Bakasi Festival niadtong tuig 2005 nga nagsentro sa “bakasi” nga abunda sa kadagatan sa Cordova. (PR ni Marilou Inoc)