Missing police nakit-ang patay
PULIS sa Cordova Police Station nga nawala sukad niadtong Miyerkules sa kaadlawon, ang nakit-ang patay ug nagkadugta na ang lawas sa bakanteng luna sa Wonder Land Firing Range, Barangay Agus, dakbayan sa Lapu-Lapu niadtong Biyernes sa gabii.
Matod ni SPO2 Allan Bataleon sa Homicide Section sa Lapu-Lapu City Police Office (LLCPO), ang lawas ni PO2 Ryan Casiban, 38, desk officer sa CPS, nakit-an sa mga nangitag kaka sa dapit.
Sumala ni Bataleon nga sa ilang pakisusi, si Orlen Cantal, 33, ulitawo ug molupyo sa dapit, ang nakakita sa lawas sa biktima.
Nakatimaho sila og patay ug sa pagsige nilag o iwag sa flashlight, nakit-an nila ang lawas sa biktima.
Atol ning pagsuwat, gipaubos sa autopsy ang lawas ni Casiban aron matino unsay hinungdan sa kamatayon niini.
Gitataw ni Bataleon nga may samad sa ulo si Casiban apan di pa nila matino kon unsay hinungdan sa kamatayon niini.
Narekober sa posisyon sa biktima ang iyang service firearm nga 9mm glock pistol, tulo ka magazine, 23 ka mga bala, cellphone ug posas.
Nagsul-ob pa sab og v-neck tshirt ug “GOA pants” ang biktima nga positibong giila mismo sa iyang inahan nga si Marilou.
Sa wa pa nawala si Casiban, niadtong Miyerkules, naghimo pa kini og duha ka blotter report nga may pangalan nila ni retired General Marcelo Garbo ug Vicente Loot.
“I want to write what is justice for all to stop all illegal drugs. God is in me,” matod ni ni Casiban sa iyang hinimong blotter.
Sa pagkutlo ning balita, padayong tanghaga sa kapulisan ang motibo sa pagkawala ug pagkamatay sa biktima.