WALAY sekreto sa paghimo og ekstra ordinaryo nga mga butang, kon di kini gisukipan og pagbati ug katuyoan aron makab-ot ang usa ka tinguha.
Kini ang impresyon nga mipatigbabaw sa kinabuhi sa 21-anyos nga Dabawenya kinsa maoy misungkit sa silver medal alang sa classical ballet ug gold medal sa sa prestihiyusong World Championship for Performing Arts (WCOPA) competition sa Estados Unidos niadtong Hulyo 8 hangtod 16.
Siya si Jemimah Keziah Morales, usa ka Dabawenya Ballet Dancer, dance teacher, ug choreographer.
"Dancing is not just a hobby. It is a passion and it comes with a purpose," ingon sa atong bida.
Human siya migraduwar gikan sa University of the Philippines (UP) Mindanao niadtong Hunyo sa kursong Bachelor of Arts in Communication Arts, nadasig siya nga mouban sa laing pito ka contingents gikan Davao City.
Ang kompetisyon sama sa counterpart sa world sports Olympics sa natad sa performing arts diin ang pinakamaayo sa tanang pinakamaayo nga mga performing artists sa tibuok kalibutan nga motigi sa nagkadaiyang kategorya.
Kini suma pa ang iyang unang kompetisyon isip usa ka performer ug iyang nagamit ang pagpanudlo niini uban ang mga katuyoan.
Gisaysay niya, nga nagsugod siya sa interes sa pagsayaw sa nag-edad pa siya og siyete-anyos diin milambo pa kini sa iyang pag-edad og 13-anyos human siya nakaundang og lima ka tuig sa maong hilig.
"When I go back to ballet, I didn't know if I liked it, I didn’t know if I fell in love with it but I just did it," ingon ni Morales.
Nahimo siyang dance teacher sa edad nga 16-anyos diin iyang napaambit ang iyang abilidad sa kabataan nga gusto masusama kaniya.
Usa sab siya sa mga magtutudlo ug artist sa Muzik Skool sa Davao City, usa ka tunghaan nga nagtudlo og pagsayaw, pagkanta, painting ug daghan pa.
"Being a dancer came to me as a necessity because I have to learn it to be able to teach others about it," saysay niya.
Gikan sa pagdala sa mga dance class, diha say mga higayon nga nagpahigayon siya og dance concerts for a cause isip pagbalik sa mga grasya nga iyang nadawat ngadto sa ubang tawo.
"I dance because it is who I am and I used dance as more than a hobby. It goes beyond that. It is nice to be able to use your talent to touch the world," ingon niya.
Usa sa di niya malimtan mao ang iyang 18th birthday human iyang gisaulog ang iyang espesyal nga adlaw sa paghimo og dance concert for a cause aron makatigum og pundo sa pagpalit og mga school supplies alang sa mga bata sa Badjao community.
Sa kalibutan kitang tanan dunay katuyoan, ang katuyoan nga mabuhi uban sa malipayon ug tunhay nga pamuyo ug ang pagtabang sa mga nanginahanglan.
Ang paghimo og mga butang sa palibot nga nakatabang sa ubang tawo maoy usa ka bahandi sa kaugalingon nga di gyud mapalit.
Kanimo, Ma'am Jemimah Keziah Morales, saludo kami sa imong pakiglambigit sa kinabuhi sa ubang tawo sa pagpaambit sa imong abilidad.