NAGDALA og dakong tanghaga kining kamatayon sa usa ka pulis sa lungsod sa Cordova nga si PO2 Ryan Casiban.
Si Casiban na-missing niadtong Agusto 10 ug napalgang patay haduol sa firing range sa dakbayan sa Lapu-Lapu nianang Hulyo 12 nga daw og sa nadugta na.
Nagkalainglaing pagduda ang mitumaw kalabot sa kamatayon tungod kay aduna kini gisuwat sa police blotter nga nagduhig og pangalan sa duha ka retiradong heneral nga sila si Marcelo Garbo ug Vicente Loot nga karon mao na ang mayor sa Daanbantayan.
Dili halayo ang pangagpas nga ang kamatayon niini may kalambigitan sa gidiling drugas tungod sa gisulat niini sa police blotter.
“I want to write what is justice for all to stop all illegal drugs. God is in me,” sigon sa nasuwat ni Casiban sa blotter.
Laing naduhig mao ang pangalan sa usa ka pulis nga si Atan Tajanlangit kinsa, matod pa nga nahisgutan usab ni Casiban.
Matod pa nga si Casiban, sa sayo pa, mipahibawo sa iyang hepe nga ang mga tawo ni Tajanlangit maoy mihulga kaniya.
Pero bisan unsa pay gisuwat ni Casiban sa blotter dili kini igong basehan ug dili angay dayon tuohan tungod kay wala may lig-ong ebidensiya nga makasuporta niini.
Ang pagpangita sa hustisya sa kamatayon ni Casiban maoy angay tutokan karon sa kapulisan.
Kon tinuod nga nigawas si Casiba sa Police Station mga alas 2:50 sa kadlawon niadtong Agusto 10, posibli nga kaila o amigo ra usab niya ang iyang gikaistorya o giubanan niining orasa.
Di usab halayo ang posibilidad nga gidala kini siya og laing dapit, gi-torture ug didto ra usab gilabay sa Barangay Agus sa Lapu-lapu.