GAWAS nga ipatandi ang bala nga nakapatay ni PO2 Ryan Casiban sa armas nga nakuha sa mga tinugyanan sa balaod, ilakip usab sa imbestigasyon si Daanbantayan Mayor Vicente Loot sa Police Regional Office 7.
Kini aron matino kon naghikog ba o gipatay si Casiban kinsa may igo sa bala ang ulo niini nga maoy hinungdan sa kamatayon.
Mimando karon ang PRO-7 sa Regional Investigation and Detective Management Division ug sa mga imbestigador sa kapulisan sa probinsya sa Sugbo sa paghiling sa armas ni PO2 Ryan Casiban aron pagtandi sa bala nga miigo sa iyang ulo.
Matod ni Sr. Supt. Rey Lyndon Lawas nga sigon sa autopsy report nga giduso sa PNP crime laboratory gidul-it ang armas sa tuong bahin sa ulo Casiban nunot sa nakita nga gun powder sa samad niini.
Kung masuta sa imbestigasyon nga lahi nga armas ang gigamit sa pagpusil mopalawom pa gyud ang kapulisan sa ilang imbestigasyon sanglit dako ang posibilidad nga kini gipusil ug laing tawo.
Dunay mga pangalan ang ipaubos sa pakisusi human kini mahinganli sa asawa sa biktima ug ang gipang suwat niini sa blotter sa Cordova police station.
Ilang ipatawag si PO2 Dindo Tajanlangit nga matod pa maoy naghulga kang PO2 Casiban sa wala pa kini makaplagi nga patay na.
Lakip sa gitan-aw nga ipaubos sa imbestigasyon si Daan Bantayan Mayor Vicente Loot nga gialigar sa pamilya nga amo ni PO2 Casiban sa dihang aktibo pa kini sa serbisyo.
“Usa pud na sa ipatan-aw nato but may mga pronouncement na si Mayor Vic Loot but we are hoping to get more of his sides and ang RIDMD na ang gitahasan sa atung regional director,” matod ni Lawas.
Sa text message nga gipadangat ni Loot sa CCTN channel 47 nga wala na siya makahinumdom nga duna siyay tawo nga PO2 Casiban sa dihang siya pa ang pangulo sa kapulisan sa probinsya.
“Wa ko kahinumdom nga naay Casiban sa ako office basin kato pa nga under nako ang Lapu-Lapu ug Cordova sa CPPO pero PO2 man na basin new recruit ug wala na me mag-abot,” matod sa mensahe ni Loot.
Apan ang asawa ni Casiban nga si Chona nga nahinabi ni Atty. Ruphil Bañoc sa iyang programang straight to the point sa dyHP iyang gitug-an nga pipila ka tuig na ang nakalabay miuban ang iyang bana sa Daanbantayan kay gipakuyog ni Loot.
Tulo matod pa sila ka pulis ang gitug-an sa iyang bana ug naa sila sa usa ka isla nga dunay resort.
Siya nagtuo nga kaila ang iyang bana ug ang mayor sa lungsod sa Daanbantayan.
““Ang akung mahinumdoman ani niya nakakuyog gyud ni siyang Loot sa Daanbantayan. Tulo ni sila ka buok wala man jud ko kalimot sir oi. Kay nananghid man akong bana. Naa daw sila sa isla molansar man daw og mayor iyang asawa,” matod ni Chona.
Miduso na sa iyang pinanumpaang pamahayag si PO2 Dindo Tajanlangit ug naa na karon sa mga imbestigador sa Cebu Provincial Police Office ug hugot niyang gihimakak nga iyang gihulga nga patyon ang maong police.
Matod ni Supt. Brindo Nacario tigpamaba sa CPPO nga silang Tajanlangit ug Casiban maoy gipabantay sa pumboat nga gipanag-iya ni kanhi PRO-7 Director Marcelo Garbo Jr apan kinahanglan pa gihapon nilang palawman ang imbestigasyon niini.