KON duna man gani angay iapil sa pagbasol niining kontrobersiya diha sa Cebu Provincial Detention and Rehabilitation Center (CPDRC), way lain kon dili si Gov. Hilario Davide III ra pud.
Kini tungod kay pila na ka reklamo ang naabot sa iyang buhatan kaniadto apan wa niya hatagi og igong pagtagad kay lagi dako siya og pagsalig sa mga tawo nga iyang gipadumala sa CPDRC.
Diha pay ginikanan mismo sa usa ka binilanggo nga nagpadala og suwat reklamo sa iyang buhatan. Ang maong suwat nga nagyagyag sa kahiwian ug iligal nga binuhatan sa mga kadagkuan sa CPDRC napatik ning mantalaan pinaagi sa kolum ni Bobby Nalzaro kinsa gipadad-an usab og kopya. Apan sa gihapon wala kini panumbalinga ug daw sa giduphan ni Davide ang mga CPDRC officials.
Karon nga aktuwal na nga nangabunggo human sa gipahigayong kinalit nga ronda sa mga tinugyanan sa balaod, ang gobernador uban ni Bise Gobernador Agnes Magpale mihimo dayon og imbestigasyon.
Niini giyagyag ni jail warden Romeo Manansala ang mga iligal nga binuhatan sa iyang partner nga si kanhi jail consultant Marco Toral kinsa una nang mi-resign sa wala pa mahitabo ang pagpangronda.
Matod niya, si Toral nagpaabang og kuwarto nga tag P30 matag oras alang sa conjugal visits, naghatag og special treatment sa pipila ka mga binilanggo ug namaligya usab og mga gadgets sulod sa prisohan.
Dunay mga higayon nga tugotan ang mga bisita nga makaistar og tag lima ka adlaw sud sa CPDRC.
Pastilan. Ug gitagad pa unta dayon sa gobernador ang mga reklamo kaniadto di unta ni mahitabo pa. Leksyon ni nimo, Gob. Imo ra diayng mga tawo ang naghimog iligal sulod sa prisohan.