PAKYAS ang Pinay nga si Marestella Torres-Sunang sa pag-abante sa finals sa women’s long jump kagahapon (RP time) sa Rio Olympics sa Brazil.
Sa 38 ka mga partisipante, si Torres-Sunang igo lang nahiluna sa ika-28 nga dapit human siya nakarehistro og 6.22 meters sa iyang unang paglayat sa qualifying round sa Olympic Stadium.
Mao kini ang labing taas nga naabot ni Torres-Sunang ug igo lang mitali og 6.10-m ug 6.15-m sa nagsunod niyang duha ka mga pag-ambak.
Layo ra kini sa personal best ni Torres-Sunang nga 6.72-m nga iyang natali sa Kazakhstan Open niadtong Hulyo, nga maoy nagpa-qualify kaniya sa Rio Games.
Sa 19 nga nagtigi sa Group B, si Torres-Sunang naoy ranked 19 ug ika-28 sa overall.
Ang top 12 jumpers mao lang ang nakaabante sa finals.
Gipasabot ni Torres-Sunang nga naapektuhan ang iyang paglayat dihang misakit ang iyang hawak atol sa warm-ups.
“Hindi ako maka-atake ng husto. Pinipigilan ko kasi kapag binibilisan ko ‘yung takbo ko, may sumasakit,” matod ni Torres-Sunang, kinsa usa ka three-time Olympian.
Nagkanayon si Torres nga dili maayo ang iyang pagtugpa atol sa warm-up.
“Dun ako na-shoot dun sa tinalunan nung sinundan ko. Sumakit ’yung hips ko,” dugang ni Torres-Sunang.