PAKYAS sila Filipino-American athlete Eric Cray ug Marestella Torres-Sunang sa ilang tagsa-tagsa ka event nga makasibog sa finals sa 2016 Rio Summer Olympics sa Rio de Janeiro, Brazil kagahapong adlawa (oras sa Pilipinas).
Mipuwesto lang si Cray sa ika-pito sa iyang heat semifinals sa men's 400m hurdles human mihuman siya og 49.37 segundos mas dugay sa nakuha niyang 49.05 seconds sa qualifying round.
Ang nanguna sab sa heat kay si Kerron Clement sa US, 48.26 seconds, ika-duha si Boniface Mucheru sa Kenya, 48.85 ug ika-tulo si Sergio Fernandez sa Spain nga may 48.87 seconds.
Sa kinatibuk-an, nabutang ang 27-anyos sa 17th place overall gikan sa 24 nga mga nakigtigi diin ang pinaka-uwahi kay na-disqualify.
Daghan ang nasayangan sa mga kakabayan ni Cray apan luyo niini daghan gihapon ang midayeg nga nakaabot siya sa semi-finals sa hurdles.
Naglaum sab ang Fil-Am athlete Southeast Asian double gold medalist nga makaapil pa siya sa 2020 Olympics sa Tokyo.
Samtang sa bahin ni Sunang, anaa sa ika-28th place siya sa women's long jump hinungdan wa makaapil sa finals sa 38 kontra niini kagahapon.
Mireshistro si Torres-Sunang og 6.22-m sa iyang unang ambak atol sa qualifying round sa Olympic Stadium.
Mao kini ang iyang pinaka-maayong ambak human sa iyang 6.10-m ug 6.15-m.
Sa tulo ka ambak ni Torres-Sunang, wa niya mabuak ang iyang personal best nga 6.72-m diin nahimo sa Kazakhstan Open niadtong Hulyo nga maoy nakapasulod niya sa Rio.
Ang top 12 long jumpers abante sa finals diin si Serbia's Ivana Spanovic ang mirehistro og pinakataas nga ambak nga 6.87-m samtang si Great Britain's Jazmin Sawyers ika-12th nga mitala go 6.53-m.
Mao kini ang ika-tulong higayong miduwa si Torres-Sunang diin kini na sab ang uwahing Olympic niya.
Tungod sa ilang kapildihan, natapos na ang kampanya sa nasud nga makasungkit og bulawang medalya.