Mongaya: Di bayani si Marcos

MAGPATAKA na lang ang mga loyalista sa pagpamahid nga “Yellowtards” ang mopa­tig­babaw sa kamatuoran nga di bayani ang diktador nga si Ferdinand Marcos. Ang akong mga bayani mao kadtong mga nakigbisog nga mahugno ang diktadurya labi na kadtong nisakripisyo sa ilang kinabuhi sama nilang Fr. Rudy Romano.

Alang sa mga wala na makahinumdom, si Fr. Romano usa ka pari nga Redemptorista nga nitabang sa mga pakigbisog sa mga urban poor, mag-uuma, mamumuo, ug uban pa kaniadtong panahon sa diktador.

Gani, lakip sa iyang mga kaalyado kaniadto mao ang mga propesyonal ug mga negusyante dinhi sa Sugbo.

Makahinumdom gyud ko kaniadtong gipakanaog sa diktador ang road users tax kay gisupak kini sa usa ka halapad nga welga nga gisalmotan mismo sa mga dagkong mga transport operators dinhi sa Sugbo.

Ug uban kanila niadtong tungora si Fr. Rudy Romano.

Mao nga pag Hulyo 11, 1985, gidagit kini si Fr. Romano sa mga tinugyanan sa balaod dungan sa usa ka batan-on nga si Levi Ybañez. Hangtod karon wala na kini sila makit-i pa. Nagtuo na ang kaparian sa Redemptorist Church nga patay na kini si Fr. Romano.

Pimentel

Makapangahas pa ra ba gyud kining mga loyalista nga moingon nga ako pay wa motuon sa kasaysayan. Pastilan.

Wa sila makahibawo nga lakip sa mga political detainees dinhi sa Sugbo ubos sa diktadurya mao ang mga lider sa PDP-Laban kaniadto nga silang Nene Pimentel ug Dodong Holganza.

Karon si Pimentel usa sa mga lider sa federalism movement nga nakakumbinser ni Presidente Rody Duterte nga modagan alang sa pagka presidente dala ang mithi sa pedera­lismo. Kanhi senador na karon, si Nene ang amahan ni Senate President Koko Pimentel.

Atong nasayran nga moanhi sa Sugbo aron maghisgot kabahin sa pederalismo kini si Nene Pimentel karong Septiyembre 21, 2016 nga anibersaryo sa pagdeklarar ni Marcos sa martial law.

Ang maong adlaw nasulod sab sa pagsaulog sa Press Freedom Week dinhi sa Sugbo.

Ug sa maong adlaw nakatak­da ang general assembly sa Cebu Federation of Beat Journalists (CFBJ) nga gipangulohan ni Elias Baquero. Akong nasabtan nga plano sa grupo nga si Pimentel mao ang ilang guest speaker.

Napukaw

Ako lang nabantayan karon nga nakalimtan na gyud tuod ang mga abuso ug mga sala sa mga Marcos sa panahon sa diktadurya. Tungod niini, ha­pit gud makadaog isip bise presidente si Bongbong Marcos.

Atong malantaw nga kini si Bongbong gustong modagan alang sa pagka presidente karong 2012.

Apan niining giingong pagtugot ni Digong nga malubong ang lawas ni Marcos diha sa Li­bingan ng mga Bayani nakapa­pukaw hinuon sa halapad nga kalihokan batok sa diktadurya.

Mao nga di ko gustong mo­­­­saway kang Presidente Du­terte. Hinuon, akong gamiton kining maong panahon nga maghisgot kon unsay mga sala sa mga Marcos kaniadtong panahon sa diktadurya.

Balanse

Human sa sunod-sunod nga pagbisita ni Presidente Duterte sa mga kampo sa militar sa tibu­ok nasud diin nisaad siya og la­in-laing mga benepisyo alang sa mga sundawo, iya karong gipangbuhian ang mga dagkong li­­der sa mga Komunista nga napri­so sama sa magtiayong Tiamzon.

Kining pagbuhi sa mga de­tinidong politikal tipik sa pa­ninguha sa presidente nga mapadayon ang peace talks didto sa Uropa tali sa kagamhanan ug sa National Democratic Front (NDF).

Daw nakat-on si Duterte sa kasinatian sa mga kanhi peace talks nga nakapasuko hinuon sa mga right-wing elements ug naminaw kanila ang mga sundawo.

Karon, makaingon kita nga dili moalma ang mga sundawo. Maglisod na sa pag-agitate kanila ang mga anti-communists batok sa kalinaw nga gitinguha ni Duterte.

Dinhi makita nato ang ba­lancing act sa administrasyon.

Hinuon, ambot kon lakip ba sa balancing act kining pagsalmot unya sa Team Rama sa PDP-Laban nga wa man silay undang sa pag-ataki kang Duterte.

(@anol_cebu sa Twitter)