DAVAO DEL SUR - Giklaro sa nag-retirong pamuno sa Provincial Social Welfare and Development Office (PSWDO) nga aduna nay giandam nga badyet ang kanhi administrasyon alang sa pagbayad sa utang nga gisingil karon sa New City Commercial Corporation (NCCC).
Gipasitab sa mga kritiko ug bokador sa kanhi administrasyong Bautista nga naningil ang NCCC sa kantidad P27,079,980 nga mga bugas ug uban pa niadtong Agosto 10 ning kasamtangan.
Sumala ni Esther Hermosisima, kanhi pamuno sa PSWDO, nga giutang ang mga produkto sa NCCC sama sa bugas, de-lata ug uban pa aron ihatag sa mga biktima sa El Niño.
Apan nadelatar kini kay miabot ang panahon sa kampanya mao nga gipundo na lamang nila sulod sa Davao del Sur Sports Complex.
Di sab makasulti si Hermosisima kon mahinayon pa ang paghatag niini ngadto sa mga nabiktima sa kalamidad ilabi na nga nihawa na siya sa iyang posisyon pagsulod sa bag-ong administrasyon.
Samtang si kanhi Davao del Sur ug karon Davao Occidental Governor Claude Bautista miangkon nga dako iyang katingala kon nganong hangtud karon padayon siyang gina-isyu sa mga bokador sa bag-ong liderato nga human na man ang eleksiyon.
"Sila na man ang namunoan, dapat mag-move on na sila ug atimanon ang panginahanglanon ug uban pang problema sa Davao del Sur. Ang akoa lang dapat dili mapasagdan nga makaluluoy ang katawhan sa tumang pamolitika bisan human na ang eleksiyon unya nganong sigehan nato og lutos ang mga empleyado nga nanarbaho ra man intawon na pero iduhig gyud sa politika," pagklaro ni Bautista.
Dugang sa gobernador nga di sab angayang madamay ang mga tawong nisuporta kaniadto sa iyang administrasyon kay normal lamang kana nga mohatag og respeto sa kinsa man ang namunoan.
Nasubo sab si Bautista human masayod sa alegasyong aduna nay pipila ka mga empleyado nga gipadala sa bukid sa lungsod sa Kiblawan.
"Ang akoa lang no unsa man ilang trabaho didto nga wa may ospital didto ug wa sab kapitolyo didto so dapat mo-reklamo sila ani sa Civil Service Commission," panapos ni Bautista kinsa wa na mosulti kung kinsa ang mga empleyado ug kinsa ang nagmando nga ibalhin sa bukid ang ubang kawani sa gobyerno. (Orlando B. Dinoy)