NAKIT-AN sa kasamtangan nga administrasyon ang grabeng kurapsyon sa gobyerno sa gipangbutang nga mga posisyon, mao nga plano karon ni Pangulong Rodrigo Duterte ang pagbankante sa tanang posisyon nga dunay presidential appointees.
Kini ang giluwatan nga pamahayag ni Duterte atol sa press conference nga gihimo Malacañang of the South sa Panacan, dakbayan sa Davao, niadtong Dominggo sa kaadlawon, Agosto 21.
Sa Lunes i-anunsyo ni Duterte ang pagdeklara sa pagbakante sa mga puwesto.
"On Monday, (Agosto 22, 2016), I would declare all positions in the government vacant, if you are there because of a presidential appointment, I will declare all your positions all throughout the country vacant," sulti ni Duterte.
Gipasabot hinuon ni Duterte nga ang mga assistants ug mga deputies mamahimong maoy mabutang sa bakante nga puwesto hangtud sa di pa mahulipan.
Wa giapil sa maong kamandoan ang mga Cabinet officials ug mga career officials.
Naitok ang presidente dihang iyang nadawat ang mga report sa padayon nga nahitabo nga kurapsyon sa mga opisina sa gobyerno, nga di niya gustong mapadayon sa iyang administrasyon.
"Until now, in my provincial visits, I still hear corruption being committed by people, especially in the regulatory agencies," dugang ni Duterte.
Wa nagduha-duha nga mipangalan si Duterte sa duha ka ahensya sa gobyerno nga anaa ang grabeng kurapsyon sama sa Land Transportation Franchising and Regulatory Board (LTFRB) ug Land Transportation Office (LTO).
Dugang sa presidente nga iyang patubagon ang LTFRB chief pinaagi sa pagpakita niya sa Malacañang samtang ang mga LTO executives ikonsidera nga karon palang daan, bakante na ang ilang mga posisyon gawas lamang sa mga career officials.
"Come to me and see me in Malacañang," dugang sa pangulo.
Ang nahisgutang press conference sa pangulo nahuman alas 4:15 sa kaadlawon. (JPC)