Planong pagtipi kang Duterte sa 2 ka terorista, gihimakak

GIHIMIKAK sa magsuong mayor ug bise mayor sa lungsod sa Talitay, Maguindanao nga giingong mibayad og P2 milyones ngadto sa duha ka terorista aron nga likidahon si Pangulong Rodrigo Duterte.

Ang maong alegasyon giingong maoy unod sa mga text messages nga mikatag sa South Central Mindanao bag-ohay pa lamang.

Apan ang pasangil gihimakak nila ni Talitay Mayor Montasir Sabal ug igsuon niini nga si Vice-Mayor Abdulwahab Sabal nga mibayad ngadto sa duha ka anak ni Sulkiple Ben hir, alyas “Marwan,” kanhi bomb expert sa teroristang Jemmaah Islamiyah nga napatay sa operasyon sa Special Action Force (SAF) didto sa Barangay Tukanalipao, Mamasapano.

Gipamahayag ni Vice-Mayor Sabal sa pakighinabi sa Bombo Radyo ug SunStar SuperBalita nga walay kamatuoran ang mga mikatag nga text messages.

Giklaro ni Sabal nga pagpangdaot lamang kini sa ilang pamilya ug dunay sagol politika susama sa paglambigit kanila sa drug trade sa probinsya ug Cotabato City.

Kahinumdoman nga ang magsuon nga mayor ug vice-mayor nahiapil sa listahan ni Pangulong Duterte nga mga druglords apan hugtanon nila kining gipanghimakak.

Andam ang mga Sabal nga moatubang sa bisan unsang imbestigasyon aron mahinloan ang ilang pangalan sa paglambigit sa illegal drugs.

Nasayran nga gipalig-on pa sa Talitay ang Oplan Tokhang Project Duterte (war on illegal drugs) nga gipangunahan sa magsuong Sabal uban ang tabang sa kapulisan, militar, lokal nga kagamhanan ug pakig-alayon sa Moro Islamic Liberation Front (MILF) ug Moro National Liberation Front (MNLF). (Edgar E. Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph