DAGHAN na sa mga lugar karon sa dakbayan, lalawigan sa Sugbo ug kasikbit nga mga probinsya ang mopahigayon og foam party alang sa ilang festival o fiesta sa komunidad.
Apan unsa man ang foam party?
Kini nagpasabot sa kalingawan diin ang mga partisipante mosayaw sa gipatukar nga musika sa dance floor nga gipauwanan og buwa o bubbles gikan sa foam machine.
Base sa kasaysayan, ang foam party nagsugod niadtong niadtong 1932 sa pag-uso sa “A Rhapsody in Black and Blue” usa ka short subject ubos sa direction ni Aubrey Scotto diin si Louis Armstrong nisayaw, niakanta ug nitukar sa iyang trumpeta sa dakong espasyo nga gilibutan sa buwa gikan sa tubig ug sabon.
Sa modernong panahon, niadtong 1990’s ang mga club maoy nagpasiugda partikular sa Ibiza, usa ka isla sa Mediterranean sea didto sa Valencia sa silangang Espanya.
Ang buwa nga mogawas sa foam machine nga mahug gikan sa taas paingon sa mga tawo nga nanayaw.
Ang foam party sa Ibiza nahimong bantugan ug niabot sa lainlaing lugar hinungdan nga naimbento ang foam cannon ni Roy Barlow nga unang giindurso didto sa United Kingdom niadtong 1992 diin nahimo nang sinemana nga foam party sa Amnesia sa Ibiza.
Dinhi sa siyudad, sagad ipahigayon ang foam party panahon sa Sinulog Festival, fiesta sa ubang local government unit ug ning bag-o ang Sadsad Festival didto sa Oslob, lalawigan sa Sugbo.
Sagad sa mga tawo nga moapil sa foam party, magtagay og mga ilimnong makahubog nga maoy makahatag og dugang kadasig sa mga partisipante.
Ang foam party sama ra sa ordinaryo nga disco, diin ang mga tawo manayaw apan ang nakalahi mao nga human sa kalingawan ikaw mabasa gumikan sa buwa nga motugpa ug motapot sa imong lawas panahon sa party nga mahimong tubig.
Ang mga tawo nga di gusto mabasa, mahimo gihapon silang makasalmot ug makasayaw sa lugar nga di maabot sa buwa gikan sa foam machine.
Pinaagi sa sound system, lights ug foam cannon, makapahigayon kana og foam party nga maoy sagad dagsaon sa mga tawo nga mahilig sa samang okasyon. Jay B. Santiago ug Queenie Jane Cabigon, CIT-U Comm Interns