LIMA ka negusyanteng nga adunay dakong impluwensya sa paugnat sa kusog ang nahilakip sa listahan sa Forbes magazine sa 50 ka labing adunahang mga Pinoy nga migawas sa September 2016 issue.
Si San Miguel Corporation head Ramon S. Ang adunay limpiyong bahandi nga nagbalor og $1.21 billion (P56 billlion) nga nagpahiluna kaniya sa ika-16 nga luna samtang si SMC chair Danding Cojuangco nagsunod sa ika-20 nga adunay $1.14 billion (P53 billion).
Ang SMC nanag-iya og tulo ka teams sa Philippine Basketball Association (PBA) nga mao ang San Miguel Beermen, Brgy. Ginebra Gin Kings ug Star Hotshots samtang si Cojuangco maoy nagsuporta sa La Salle basketball team.
Kaniadto, gitawag sab si Cojuangco og godfather sa Philippine basketball tungod sa iyang pagsuporta sa national team pinaagi sa Northern Consolidated.
Ang tag-iya sa laing PBA team Alaska Aces nga si Wilfred Uytengsu anaa sa ika-36 nga puwesto nga adunay $260 million nga bahandi (12 billion).
Ang laing sportsman nga anaa sa listahan mao ang tag-iya sa PBA squad GlobalPort Batang Pier nga si Mikee Romero, kinsa anaa sa ika-49 nga adunay $150 million (P7 billion) nga limpiyong bahandi.
Ang labing adunahang sportsman mao si Enrique Razon, kinsa maoy mayorihiyang nagsuporta sa Philippine golf pinaagi International Container Terminal Services Inc. (ICTSI).
Nahimutang si Razon sa ikawalo nga dapit nga adunay $3.5 billion.