LINIBO nga kantidad sa salapi, mga improvised nga hait nga hinagiban, drug paraphernalia, pornographic materials, ug daghan pa nga gidili nga butang sud sa prisohan ang nakumpiska sa mga jail officers ug kapolisan sa gipahigayon nga surprisang “Oplan Greyhound” sa Maa City Jail sa Davao City niadtong Huwebes, Setyembre 1, sa buntag.
Si Jail Senior Inspector Robert Gotico, bag-o nga deputy jail warden sa Maa City Jail sa Davao City, nagbutyag nga usa sa ilang tumong mao ang pagpaneguro nga walay ilegal nga aktibidad ug ilegal nga droga sulod sa mga selda.
“Gipaneguro nato nga walay illegal drugs sa sulod, ang misugat nato during sa oplan greyhound mao ning mga butang nga gidili,” ingon ni Gotico nga nahinabi sa SuperBalita.
Gawas sa mga gidili nga mga butang, nakumpiska sab sa operasyon ang salapi nga mokabat sa P120 mil.
“Gipaabot nato ang ilang mga kabanay nga maoy authorized nga hatagan aning ilang kuwarta,” dugang ni Gotico.
Regular nga gihimo sa Bureau of Jail Management and Penology (BJMP) ang Oplan Galugad sa mga bilanggoan aron maseguro nga walay ilegal nga aktibidad ang mga piniriso.
Nagsugod ang istriktong pagronda sa otoridad human nadeskobrehan nga dunay nagluto og shabu sulod sa New Bilibid Prison.