Kapolisan mipasabot sa State of Lawlessness

GIPASABOT ni Police Regional Office (PRO) Regional Director Nelson Constantino nga layo ra nga mahitabo ang gikabalak-ang martial law sa gideklarar ni Presidente Rodrigo Duterte nga state of lawlessness human sa pagpamomba sa Davao City nga gikamatay sa pipila ka mga sibilyan.

Gipasabot pag-ayo niini nga ang state of lawlessness usa ka paghatag og labihan ka hugot nga seguridad sa tibouk publiko labina kung ang sitwasyon gikinahanglan kaayo og intervention sa kapolisan og military.

Tungod sa daghang hulga nga nahitabo, kinahanglan ibalik sa kapolisan ang normal nga sitwasyon alang sa seguridad sa tibouk katawhan.

Gipaniguro sab ni Constantino nga ang pagdeklara ni Duterte og state of lawlessness layo ra sa gikabalak-ang basin pagdeklarar og martial law.

Gipasabot ni Constantino nga magdeklarar lamang ang president niini kung adunay rebelyon nga mahitabo, ug anaa sa delikado ang tibouk publiko.

“I assure everyone na hindi po ito in any way leading to declaration,” butyag ni Constantino.

Ang deklarasyon usab niini tungod kay mahimo kaayo sa president nga manawagan sa kapolisan nga pakigbatokan ang terorismo ug krimen.

Seguridad

Gibutyag sab ni Constantino nga sa pagdeklarar ni Presidente Duterte niini hugot ang ilang gipatuman nga seguridad sa tibouk rehiyon diin adunay mga checkpoint sa entry ug exit point sa dakbayan ug bisan sa kasikbit nga mga lungsod.

Aduna sab silay gipatuman nga target hardening measure labina sa mga soft target sama sa simbahan, merkado, parke ug uban pa nga mga lugar nga sagad dagsaan og katawhan.

Matod ni Constantino nga ang pagpamomba sa Davao City walay kalainan sa nahitabong pagpamomba sa dakbayan sa Cagayan de Oro tulo na ka tuig ang nilabay.

Kini tungod kay puntirya kon target sa mga terorista mao ang mga sibilyan nga walay kalaban-laban ug dili ang kapolisan ug military.

Gihimo sab nila ang pagpanghadlok sa katawhan o publiko nga hinungdan sa ilang mga kataranta.

Tungod usab niini, naghangyo si Constantino sa tibuok katawhan sa rehiyon nga dili magpasagad ug kung bisan unsa nga mamatikdan nga kadudahang lihok sa usa ka tawo i-report gayud dayon kini sa kapolisan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph