UNA na siyang nikulit og pangan sa music scene pinaagi sa iyang mga kantang Bisrap (Bisaya rap), diin lakip sa iyang gipauso niadtong 2002 ang Pasikat, Pinasagdan sa Kusina ug T-Bak.
Ang maong kasinatian maoy nagbukas niya og oportunidad sa mas dako nga wanang sa kalingawan isip CEO sa iyang Brownian Records and Production (BRP), nga aktibong nagpaluyo karon sa mga dagkong event dili lang sa Sugbo kundi sa Kabisay-an ug Mindanao. Kon sayon o lisud ba ning trabahoa?
Ato nang mahibaw-an sa mosunod natong Q and A. MC Rey Nacilla, Sssuper Ka!
Unsay gi-cater sa BRP?
Over-all technicalities, from talents and event organizing to sound and stage production. Sa mga fiesta ug Charter Day sa mga kalungsuran ilabi na sa LGU ug sa uban nilang mga activity.
Mo-organize mi og concerts, variety ug corporate shows, foam party, paint electro dance party, mobuhat mi og commercial and political jingles, AV commercials, event styling ug tanang klaseng pang-entertainment.
Unsay mga project nimo karong tuiga?
Mga out of town event sa Vismin, pareho ato kang Matteo Guidicelli (Sibonga), Barbie Imperial (Siquijor), Crazy Duo (Mindanao) ug uban pa.
Ako say technical coordinator sa usa ka political party sa miaging eleksyon and technical coordinator ug DJ provider sad ko sa bag-o lang nahuman nga Asia Pacific Ironman sa Shangri-La. Ako say talent supplier sa Elizabeth mall.
Nganong Brownian ang napili nimong pangan sa production?
Gikuha ni nako sa Brownian Method nga maoy pangan sa akong grupo niadto sa rap. Ug aron dali ra pud mailhan mao ako nalang gihimong Brownian Records & Production.
Unsay naka-inspire nimo magtukod og kaugalingong production?
Katong nihinay na ang gigs sa Brownian Method, niapil kog showband, then nahimo kong entertainer sa Cosap isip rapper sa drama ug variety show sa City Hall for almost 10 years. Hangtod nga nag-agent ko og talents sa mga ginagmay nga shows.
Katong nawala na ko sa banda ug wala na sad koy show, hala ang mga tawo ari na man mangita nako og talents, like banda, magician, singers, comedian, dancers, beatboxers hasta sound & lights pud ug uban pang technicalities, ug kasagaran mga dagkong kompanya nga naay corporate events ilabi na Christmas party. Then ako silang suplayan.
Karon kay mangita man og resibo mao nga nagbuhat na lang gyud kog akong production. Gikan sa gamay nga inquiries ang mga talents nga akong contacts wa man sab silay O.R. mao ako jud gipa-rehistro.
Mao ni nakahatag nako og challenge ug inspirasyon.
Unsay imong reaksyon kon dunay mga technical problem?
Di gyud na malikayan. Makasugat jud ta ana. Mao nang usahay kulbaan ta aning trabahoa. Akong reaksyon siyempre madismaya ug maglagot kay ako may ma-blame sa kliyente isip coordinator.
Kon naay palpak, wa nay musalig nimo kay diha man ihansak nimo tanang sayop. Mao nang double check jud pirmi, di mokumpyansa kay lisud kaayo ingon ana nga sitwasyon.
Unsay mga sagad problema ang imong masugatan?
Kasagaran technical ug kanang talent’s behavior. Mao jud nang duha. Mao dapat naa gyuy dry run or rehearsal before sa show, early set up/ingress sa mga technical para malikayan ang error.
Then dapat naa gyud kay kontrata sa talent ug dunay briefing aron aware sila unsay dagan sa show.
Unsay mga elemento nga dapat e-consider kon maghimo kag show?
Una, ang budget. Ikaduha, ang concept. Aron kahibawo ka sa limitasyon sa imong kliyente ug kon unsaon nimo pagpadagan ang show.
Unsay ganahan nimo aning trabahoa and how do you stay motivated?
Malingaw ko kay mao man gyud ni akong kinabuhi sukad pa sa una, ang entertainment. Maora ra kog wala motrabaho.
Maayo man sad ang kita. Ang importante nga naa silay trust nako ug sa akong kompanya.
Unsay imong buhaton kon ma-stressed ka atol sa show?
Mopahuway ra ko ug mo-take og medicine, then ipa-handle nako sa akong mga tawo kon di jud makaya sa lawas.
Kon himoan nimo’g themesong ang imong production, unsa kahay title?
Siyempre “Trust BRP.” Naa na bitaw ni jingle akong production kay mao gud nay atong trabaho.
Papaminawon unya tika kay amo nang tukaron sa akong birthday party karong Sept. 18. Adto ha!
Unsay imong birthday wish?
Good health for my family, more blessings, more projects ug unta daghan pang mo-trust sa among production. Successful lang unta ang tanan namong events. Happy always ang life.