Libre na ang emergency services sa VSMMC

LIBRE na ang serbisyo sa mga pasyente nga madangat sa emergency department sa Vicente Sotto Memorial Medical Center (VSMMC) nga nahimutang sa dakbayan sa Sugbo.

Apil sa way bayad ang laboratories, tambal ug procedures sama sa x-ray ug CT scan sa mga pasyente.

Si Dr. Gerardo Aquino, chief of hospital sa VSMMC, niklaro nga kadto lang emergency cases ang libre ug kadtong di kay adto sa Out-Patient Department (OPD).

Sa giisyu nga Hospital Order No. 1216 nga pinetsahan og Agusto 23, si Aquino nipahibawo nga tanang mga pasyente nga makita sa Emergency Department ang makapahimus sa libre nga serbisyo, apil ang mga tambal, laboratories ug procedures sa pagpatambal sa mga emergency nga kaso sugod niadtong Septiyembre 1.

“Kon emergency man gud, normally igdagan nimo sa hospital usahay di gani ka kadala sa imong bag, di gani ka kadala sa imong pitaka, so dagan kag emergency room,” sumala ni Aquino sa pakighinabi sa Superbalita Cebu kagahapon.

Matod niya kini ang ilang sanong sa gitinguha sa administrasyon ni Presidente Rodrigo Duterte nga mohatag og libre nga serbisyo labi na sa way ikasarang sa pagpatambal pinaagi sa Duterte Health Agenda.

Mokabat sa P5 milyones matag buwan ang iyang gipangayo nga pundo sa ulohang buhatan pinaagi sa iyang suwat ni Health Assistant Secretary Nestor Santiago Jr. sa pagpatuman sa programa.

Kon i-admit ang pasyente unya maila nga kabos ug di pa miyembro sa Philhealth, ang VSMMC na ang mo-enrol niini sa Point-of-Care Enrolment Program sa Philhealth.

Si Aquino nipasabot ang ospital ang mobayad sa premium sa pasyente sa Philhealth ug wa na kini bayran sa billing kun “zero billing.”

Nalantawan ni Aquino, nahimo nga chief of hospital sa VSMMC sukad niadtong Disyembre 1, 2006, nga mas modaghan ang pasyente sa emergency room sa ospital karon nga libre na ang serbisyo. Kaniadto, mo-average og 140-160 ka mga pasyente ang ospital matag adlaw.

Gumikan kay way pasyente nga balibaran ang VSMMC, naa gihapon ang pagsawo sa tulo ka pasyente sa usa ka higdaanan.

“Ang joke diri sa una mosulod ka og Sotto, ang unang pangutana taga asa ka? Dili ang unsay imong gibati o unsay deperensya sa imong lawas, unya gwardiya ang unang mangutana. Dili ka inaug sa ambulansya kon taga city ka, paadtuon ka sa CCMC. Sa akong panahon wala nana, ang akong policy diri, way balibaray,” dugang ni Aquino.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph