Alcea Maningo
Cangyan, Carmen, Cebu
SABADO sa buntag. Nakahuman nag pamahaw si Celso. Wa pa hinuon kainom og tubig. Unya miabot si Nova, iyang kapikas, nga nagdala og bulsita. Gibutang ni Nova ang bulsita ibabaw sa lamesa. Ganahan mokaon og pan si Celso kon way prutas kada human og pamahaw. Giablihan niya ang bulsita. Dunay mga pinutos sa plastik ang sulod, lainlaing matang sa pan.
“Mga pan ni?” matod ni Celso.
“Tataw baya nga pan na! Mangutana pa gyud!” ni Nova.
Daghan nang mga higayon nga suplada o pilosopo ang tinubagan sa iyang asawa. Kanunay lang siya suphon sa iyang asawa. Magpasensiya lang siya. Usahay makaingon siya sa iyang kaugalingon nga nakaminos ang iyang asawa kaniya, gibugoan o gigaguhan niya. Mahiubos usahay siya sa iyang asawa, apan iya lang giluom. Apan karon, nakahukom siya nga di na niya kini palabyon.
“Nasayod ka ba nga mas dautan ka pa kay ni Satanas?” ni Celso nga mahagiton.
“Ha?! Ngano god tawon?” ni Nova nga naisa ang kilay.
“Mismo si Satanas wa magsinuplado o magpinulosupo sa atong Ginuo nga kaaway niya. Ikaw grabe kasuplada ug kapilosupo ngari nako nga imong bana. Dili man unta ta kontra!” ni Celso nga mitan-aw sa nawong ni Nova.
“Diin man na nimo hisayri nga si Satanas wa magsinuplado sa atong Ginuo?” ni Nova.
“Sa Bibliya, sa libro ni Job. “Ang Ginuo nangutana kang Satanas, “Diin man ka magsuroy-suroy? Tarong nga mitubag si Satanas. Wa gyud moingon nga, ‘Di ka na angay mangutana kay nasayod ka sa tanan.’ Busa ikaw, mas dautan ka pa kay kang Satanas!”
Mitibi si Nova, kahilakon. “Pasayloa lang ko. Dinala na tingali ni sa akong pag menopause.”
“Mao ba?”
“Oo!”
“Pasensiya na lang sab ka nako, kon magsige kog pangutana bisag nasayod na sa tubag, ha?” ni Celso.
“Ngano man?”“Dinala tingali sa akong andropause, o sa akong mikupos,” ni Celso nga nagngisi.
“Ayna lag hunahuna ana. Daghan na tag mga apo.”
“Mao lagi. Imong gipasabot nga tiguwang na ta. Dapat magsinabtanay ta. Ang estorya magsugod sa pangutana. Mao nga mangutana gyud ko. Ang Ginuo mangutana man gani, ako pa kaha ang dili.”
“Gawas kang Satanas, kinsa pay gipangutana sa Ginuo?” ni Nova.
“Si Adan ug si Eba. Matod sa Ginuo, ‘Gikaon ba ninyo ang bunga nga akong gidili?’ sa bukid sa Sinai, gipangutana sa Diyos si Moises kon unsay iyang gigunitan. Wa sila magpinulosupo.” Miduol si Celso kang Nova.
“Sige, sukad karon tubagon na nakog tarong ang imong mga pangutana,” ni Nova nga mitan-aw sa nawong ni Celso. “Di ko gustong mahimong mas dautan pa kay kang Satanas.”
Unya naggakos ang tiguwang nga magtiayon, daw mga bag-ong minyo, kay sila na man lang duha sa ilang balay. Ang duha nila ka mga anak naglain na pagpuyo sukad nangaminyo. (Katapusan)