SAMTANG didto siya sa likod sacristy sulod sa simbahan sa Monastery of the Holy Eucharist sa Marian Hills, Lindogon, Simala, Sibonga, wa magdahom si manlalaban Divine Marcial Flores sa iyang makita-naghilak ang imahen ni Blessed Virgin Mary nga gisulod sa orna.
Matod ni Flores sa interview sa Superbalita Cebu, nga didto na siya sa monasteryo niadtong Huwebes atol sa kasaulogan sa adlaw nga natawhan ni Birhen Maria.
Kagahapon sa buntag didto siya sa likod sa sacristy mga alas 6 sa buntag dihang iyang nabantayan.
“Nag-shed tears siya ganiha. I was able to witness it and I have pictures and video,” sugilon ni Flores sa Superbalita Cebu.
Segurado siya nga ang imahen naghilak apan wa niya mahikap tungod kay gisulod kini og orna ug gikandaduhan.
Wa siya makapugong sa iyang gibati, nakahilak siya samtang nagsud-ong sa imahen.
“Pwerti gyud nako hilak nga nag-pray sa rosary,” dugang ni Marcial.
Gawas nga usa ka abogada, si Marcial duha na ka dekada nga brodkaster. Naa siya sa sibyaanang dyRC ug CCTN Channel 47.
Gawas kaniya, dunay laing mga tawo nga nakasaksi sa giingong talagsaon nga hitabo.
Si Episcopal Vicar Msgr.Esteban Binghay niingon nga wa na kinahanglana nga moimbestigar pa ang simbahan sa hitabo.
Siya mismo nakakita sa mga milagro sa Simala.
Matod niya nga kini timailhan nga nanawagan ang Birhen Maria sa katawhan nga mag-usab na.
“There is no need to investigate Simala miracle. It is a sign that the Virgin Mary is calling us to go back to God. Gi-Tokhang nata ni Mama Mary and if you don’t respond to it, basin matikwang ta. But while its okay to subscribe to this miracle, ang ato lang nga dili ta mahimong mga fanatics. Ako mismo naka-witness sa milagro sa Lindogon and I can attest to it,” nagkanayon si Binghay sa interview sa Sun.Star Cebu.
Si Msgr. Joseph Tan, tigpamaba sa Archdiocese sa Sugbo, mabinantayon og tubag kabahin sa hitabo.